Польшча вітае амерыканскіх вайскоўцаў
13- 12.01.2017, 19:27
- 16,825
У мясцовасці Жагань на захадзе Польшчы адбылася ў чацвер цырымонія вітання амерыканскіх вайскоўцаў.
У чацвер нямецка-польскую мяжу перасёк першы амерыканскі аўтаканвой у складзе БМП і грузавікоў. Раней, больш за тысячу амерыканскіх жаўнераў прыляцелі ў Вроцлаў, Познань ды іншыя гарады, перадае «Радыё Польшча».
Яны будуць служыць у Польшчы і іншых краінах нашага рэгіёну ў рамках аперацыі Atlantic Resolve, якая з'яўляецца адказам на агрэсіўныя дзеянні Расеі ў нашым рэгіёне.
Вітаючы на польскай зямлі амерыканскіх матросаў камандзір 11-й Любушскай бранятанкавай брыгадай генерал Яраслаў Міка нагадаў аб шматвяковай традыцыі супольнай польска-амерыканскай барацьбы за незалежнасць, якую сімвалізуюць героі Вайны за незалежнасць ЗША Тадэвуш Касцюшка і Казітмеж Пуласкі.
У сваю чаргу камандзір амерыканскай баявой групы палкоўнік Крыстафер Норы адзначыў, што амерыканскія жаўнеры прыбылі ў Польшчу для падтрымкі хаўруснікаў, а таксама стрымлівання патэнцыйнага агрэсара. Амерыканскія вайскоўцы і вайсковая тэхніка будуць размешчаныя ў Жагані, Свянташуве, Сквежына і Балеславецэ.
На 14 студзеня ў гарадах усёй Польшчы запланаваны афіцыйныя цырымоніі вітання амерыканскіх салдат. Цэнтральныя ўрачыстасці з удзелам прэм'ер-міністаркі Польшчы Беата Шыдло і міністра нацыянальнай абароны Антоні Мацярэвіча пройдуць у Жагані.
Прыкладна 4,5 тысячы вайскоўцаў ЗША будуць несці службу на тэрыторыі Польшчы, Літвы, Латвіі, Румыніі, Балгарыі і Вугоршчыны. Ратацыя амерыканскіх войскаў будзе праводзіцца кожныя дзевяць месяцаў.