Беларускі дадатак для сэлфі атрымаў $2 мільёны інвестыцый

Мабільнае дадатак Fabby змяняе фон сэлфі з дапамогай нейронавых сетак.

Новы праект сузаснавальніка Maps.me Юрыя Мельнічка — мабільны дадатак Fabby, які дазваляе змяняць фон сэлфі з дапамогай нейронавых сетак, — атрымаў $2 млн інвестыцый у «пасяўным» раўндзе, лідарам якога выступіў фонд Юрыя Гурскага Haxus, паведамілі dev.by у інвесткампаніі.

Fabby плануе выкарыстоўваць атрыманыя сродкі для ўзмацнення тэхналогіі аўтаматычнага аддзялення аб'екта ад фону на фотаздымках і відэа.

Аснова Fabby — уласны фрэймворк для прайгравання нейронавых сетак на смартфоне. Сэрвіс працуе так: вы робіце сэлфі, а дадатак «атачае» вас фонам. Варыянты ёсць розныя: падпалены камін, паўночнае ззянне, салюты, сняжынкі і нават каты, што валяцца з неба. Частка фону аніміраваная, з імі звычайная фатаграфія ператвараецца ў пацешнае відэа.

Вось што распавядаў tut.by пра Fabby Юрый Гурскі:

— Асноўная ідэя дадатку, вядома, не ў сэлфі самім па сабе: за ім стаіць магутная тэхналогія апрацоўкі малюнка з дапамогай нейронавых сетак. Нейронавая сетка на прыладзе карыстальніка аддзяляе аб'ект ад фону ў рэжыме рэальнага часу.

Падобны падыход рэалізаваны ўпершыню ў свеце, таму што распрацоўка патрабуе вырашэння не толькі нетрывіяльных матэматычных задач, але і старанна падрыхтаванага велізарнага дата-сэта. Раней такія задачы вырашаліся толькі на серверах у воблаку, што патрабавала велізарных вылічальных магутнасцяў і запавольвала працу ўсёй праграмы.

У будучыні тэхналогію можна будзе выкарыстоўваць не толькі для аддзялення чалавека ад фону, але наогул для выдзялення любога аб'екта ў відэаструмені, напрыклад, для сартавання смецця або знішчэння пустазелля.

Самае відавочнае ўжыванне для тэхналогіі, са слоў яе стваральнікаў, — замяняць фон падчас відэаканферэнцый, каб можна было выкарыстоўваць відэасувязь, напрыклад, з дома і «не саромецца, што там на заднім плане». У планах стартапа — апрацоўка 360-градусных фота і выкарыстанне «кастомных» карыстацкіх фонаў.

Праект стартаваў у жніўні 2016. Інвестыцыі (у тым ліку ад фонду Haxus) на стадыі запуску склалі больш за $500 тысяч. Сёння распрацоўку вядзе каманда з 15 чалавек у двух офісах у Менску і Цюрыху. У наступным месяцы Fabby абяцае Android-рэліз, пашыранае распазнаванне аб'ектаў і апрацоўку відэа ў real-time. Глабальныя задачы — даць карыстачу смартфона магчымасці працы з відэа «як у Галівуду» і пабудаваць у Беларусі вялікі даследчы цэнтр у сферы нейронавых сетак і штучнага інтэлекту.

22 снежня дадатак атрымаў статус editor's choice у App Store некалькіх краін, уключаючы ЗША і Расею.