Дадону пагражае імпічмэнт праз заляцанні да «кіраўніцтва» Прыднястроўя

Апазіцыя сцвярджае: Дадон фактычна прызнаў незалежнасць Прыднястроўя, чаго не рабіў ніводзін з прэзідэнтаў Малдовы.

Ліберальная партыя Малдовы рыхтуе заканадаўчую ініцыятыву аб правядзенні рэферэндуму аб адстаўцы прэзідэнта Ігара Дадона. Пра гэта заявіў лідар малдаўскіх лібералаў Міхай Гімпу, паведамляе Укрінформ.

«Ініцыятыва прадыктаваная, перш за ўсё, тым, што Ігар Дадон дазволіў сабе павіншаваць Вадзіма Краснасельскага (лідар непрызнанага Прыднястроўя – рэд.) з перамогай на так званых прэзідэнцкіх выбарах. Віншуючы Краснасельскага, Ігар Дадон фактычна прызнаў незалежнасць Прыднястроўя, чаго не рабіў ніводзін з кіраўнікоў Малдовы. Калі мы не спынім гэтую антыканстытуцыйную дзейнасць цяперашняга прэзідэнта Малдовы, сітуацыя можа яшчэ больш пагоршыцца», – заявіў Гімпу.

Прадстаўнікі кіроўнай кааліцыі на чале з Дэмакратычнай партыяй, у сваю чаргу, заявілі, што «спачатку неабходна звярнуцца ў Канстытуцыйны суд з запытам, ці парушаў Ігар Дадон Канстытуцыю».

«Калі Канстытуцыйны суд вынесе вердыкт, што прэзідэнт парушыў Асноўны закон дзяржавы, у рамках кіроўнай кааліцыі мы прымем пастанову аб нашых далейшых дзеяннях», – пракаментавалі ініцыятыву лібералаў у Дэмакратычнай партыі.

У той жа час прэс-сакратар Ігара Дадона Іён Чэбан заявіў, што «прэзідэнт заўсёды гатовы паўстаць перад палітычным судом грамадзян».

Паводле малдаўскага заканадаўства, для рэгістрацыі ў парламенце заканадаўчай ініцыятывы аб імпічменце неабходныя подпісы 34 дэпутатаў парламента са 101. Ліберальнай партыі неабходна заручыцца падтрымкай прадстаўнікоў кіроўнай кааліцыі, бо ў парламенце яе прадстаўляюць толькі 12 чалавек.

Як вядома, Ігар Дадон не толькі павіншаваў Вадзіма Краснасельскага, з перамогай на выбарах «кіраўніка» рэгіёну, але і правёў з ім афіцыйную сустрэчу 4 студзеня ў Бэндэрах.

Як паведамляецца, Дадон і Краснасельскі абмеркавалі мноства пытанняў, аднак не тычыліся палітычных, «статусных» пытанняў. Такія абмежаванні ў парадку дня ўдзельнікі перамоў патлумачылі нежаданнем ператвараць жыхароў абодвух берагоў Днястра ў «закладнікаў палітыкі».