Даходы ад нафты абрынуліся на 40%
11- 17.01.2017, 14:27
- 30,662
Экспарт нафтапрадуктаў у фізічным вымярэнні знізіўся амаль на 20%, у грашовым вылічэнні - на 40%.
Экспарт беларускіх нафтапрадуктаў у студзені-лістападзе 2016 года склаў 12,3 млн тон і скараціўся ў фізічным вымярэнні на 19,3% у параўнанні з аналагічным перыядам 2015 года, паведамляе БелаПАН.
У грашовым вылічэнні экспарт беларускіх нафтапрадуктаў у студзені-лістападзе склаў 3,78 млрд даляраў і зменшыўся ў параўнанні з аналагічным перыядам 2015 года на 39,2%.
Трэба таксама адзначыць, што ў аналізаваны перыяд Беларусь скараціла пастаўкі нафтапрадуктаў у Расею. У студзені-лістападзе 2016 года рэзідэнты Беларусі вывезлі на расейскі рынак 264,7 тысяч тон нафтапрадуктаў, што амаль на 70% менш у параўнанні з аналагічным перыядам 2015 года.
Нагадаем, беларускія ўлады аргументавалі летась скарачэнне паставак нафтапрадуктаў на расейскі рынак тым, што адпаведна з цэнавымі ўмовамі рэалізацыя беларускага паліва ў Расеі невыгодная.
У сваю чаргу, улады РФ, спасылаючыся на раней падпісаныя дамовы з Беларуссю, намагалі на пастаўцы на расейскі рынак 1 млн тон аўтабензіну.