«Занадта свабодны чалавек»
1- 17.01.2017, 19:19
- 20,123
Названая дата выхаду ў пракат дакументальнага фільма пра Барыса Нямцова.
Дакументальны фільм пра Барыса Нямцова рэжысёркі Веры Крычаўскай і журналіста Міхаіла Фішмана «Занадта свабодны чалавек» выйдзе ў пракат у Расеі 23 лютага, паведамляе РБК.
Як адзначылі ў ЦДК, стваральнікі фільма экранізавалі поўную палітычную біяграфію Нямцова. Крычаўская і Фішман падчас стварэння фільмы правялі працу з архіўнымі матэрыяламі. Дакументальная 126-хвілінная стужка пабудаваная на інтэрв'ю і на «ўнікальных» дакументальных здымках Барыса Нямцова.
У фільме «Занадта свабодны чалавек» пра загінулага палітыка і пра гісторыю Расеі агулам распавядаюць ягоныя сябры, калегі, сваякі і палітыкі, такія як Міхаіл Фрыдман, Міхаіл Прохараў, Рыгор Яўлінскі, Віктар Юшчанка, Міхаіл Хадаркоўскі, Міхаіл Касьянаў, Аляксей Навальны, Раіса і Жанна Нямцовы, Яўген Кісялёў, і іншыя.
Як распавяла рэжысёрка кінастужкі Крычаўская, «асабісты і палітычны лёс Барыса Нямцова непарыўна пераплёўся з гісторыяй постсавецкай Расеі». Яна адзначыла, што стваральнікі фільма задаваліся мэтай распавесці пра Нямцова «праз гісторыю апошніх 25 гадоў жыцця Расеі, і гісторыю Расеі праз апошнія 25 гадоў жыцця Барыса Нямцова».
У сваю чаргу Фішман назваў фільм «Занадта свабодны чалавек» данінай памяці выбітнаму палітыку сучаснай Расеі» і адзначыў, што Нямцоў — «глыбокая, магутная постаць». «Наша віна ў тым, што мы, многія з нас, сталі ўсведамляць гэта ўжо пасля таго, як ён загінуў», — сказаў Фішман.
Фільм «Занадта свабодны чалавек» стаў лаўрэатам прэміі Гільдыі кіназнаўцаў і кінакрытыкаў «Белы слон» у намінацыі «Найлепшы дакументальны фільм 2016», гаворыцца на сайце Гільдыі кіназнаўцаў і кінакрытыкаў.
Фільм выходзіць у пракат за пяць дзён да гадавіны забойства Барыса Нямцова, якое адбылося 27 лютага 2015 года. Ён быў застрэлены на Вялікім Маскварэцкім мосце ў Маскве. Паводле версіі следства, забойства палітыка было заказным, і яго выканаўцы атрымалі не менш за 15 млн руб.