Вольга Маёрава: Да трагедыі ў Рагачове давяла «сацыяльная дзяржава»

Але нельга адчайвацца пасля атрымання «ліста шчасця» і развязваць праблему аднаму.

Пра гэта ў інтэрв'ю сайту Charter97.org заявіла грамадская актывістка Вольга Маёрава, каментуючы рэзанансны выпадак у Рагачове, калі жанчына павесілася пасля атрымання «ліста шчасця»:

- Чыста па-чалавечы, акрамя жаху цяжка што-небудзь адчуваць. Калі ж гаварыць як чалавек, які займаецца абаронай правоў людзей, то гэты выпадак з'яўляецца вынікам поўнага бяспраўя, таго, што нашая «сацыяльная» дзяржава абсалютна перастала быць такой. У людзей не засталося ніякіх механізмаў абароны сваіх правоў. Гэта я ўважаю за ключавы момантам.

У краіне павінна праводзіцца максімальнае інфармаванне людзей. Мне вельмі шкада, што толькі апазіцыйныя СМІ пішуць аб такіх трагічных выпадках. Гэта само па сабе ўжо характарызуе дзяржаву.

Таксама, на мой погляд, у краіне павінна быць створаная сістэма падтрымкі людзей, якія трапілі ў цяжкія жыццёвыя абставіны. Яе адсутнасць – чарговая хіба нашай нібыта сацыяльнай дзяржавы.

У краіне дабрачыннасць практычна забароненая законам, яна абкладаецца вельмі вялікімі падаткамі, таму немагчыма стварыць сетку. У выніку, беларусы не могуць матэрыяльна падтрымаць людзей, якія трапілі ў цяжкую жыццёвую сітуацыю.

Адсутнасць дзяржаўнай падтрымкі - вельмі балючае пытанне, якое можна развязваць толькі на ўзроўні бюджэту, а для гэтага патрэбны нармальны парламент. Вось тут мы ўпіраемся ў чыста палітычныя рэчы, якія варта разглядаць на дзяржаўным узроўні. Ад прыватнай праблемы мы пераходзім да агульнадзяржаўнай.

- Якія ёсць выхады ў беларусаў, якіх падаткавікі запісалі ў «дармаеды», акрамя крайніх мер?

- На мой погляд, самы кардынальны выхад – гэта аб'яднанне грамадства, таксама ёсць надзея на асобных праваабаронцаў, якія дапамагаюць людзям. Мы можам разлічваць на незалежны прафзвяз РЭП, на праваабаронцу Алега Воўчака - гэта людзі, якія прапануюць канкрэтную дапамогу беларусам.

Калі казаць аб рэальным супраціве падатку, то адзін са сродкаў – гэта масавыя нявыплаты «дармаедаў».

Я мяркую, калі беларусы выявяць салідарнасць, не пойдуць на павадку ва ўладаў і адмовяцца плаціць падатак, то гэтым яны створаць умовы, калі ўлады не змогуць з імі справіцца.

У выпадку, калі людзі пачынаюць выплачваць, яны становяцца вельмі ўразлівымі, калі ж вялікая колькасць адмовіцца плаціць, то ўлады да кожнага не дабяруцца і вось тады яны пачнуць баяцца масавых выступаў.