Дыктатар зноў падмануў народ і так не разабраўся з тарыфамі «ад балды»
27- 19.01.2017, 10:22
- 17,116
Год прайшоў, рэформу ЖКГ правялі, аднак разлікі зноў зрабілі «ад балды».
На днях былы старшыня Вярхоўнага Савета Мечыслаў Грыб вырашыў параўнаць квіток за снежань з квітком за аналагічны перыяд пазамінулага года.
«Я ўзяў, паглядзеў, і высветлілася, што на 30% за снежань 2016 я заплаціў больш, чым за снежань 2015-га года. Тым больш, што пенсія ў мяне засталася такая ж, якая была год таму», – распавёў Мечыслаў Грыб тэлеканалу «Белсат».
«Жэстачайшэ» не пакараў?
Разабрацца з вінаватымі ў завышаных цэнах па разліках за паслугі ЖКГ і надзець на іх кайданкі Лукашэнка загадаў яшчэ летась у лютым.
Неўзабаве тых, хто, са слоў дыктатара, прыдумаў такую «балду» быццам бы арыштавалі, аж з дзясятак чалавек. Прынамсі, так паведамілі ўлады. Але канкрэтных імёнаў не агучылі. Нічога не вядома пра таямнічыя справы і да сённяшняга дня. Урад жа ў сваю чаргу распачаў рэформы сістэмы жыллёва-камунальнай гаспадаркі.
Ці сталі за гэты год беларусы давяраць сістэме ЖКГ?
«Не давяраю. Чаму? Бо не апраўдана гэта ўсё. Не відаць наглядна, што і як»
«Не ведаю, ад чаго гэта залежыць, але яна не эфектыўная – гэта дакладна»
«Заўсёды любую цану можна растлумачыць. Тут толькі майстэрства бухгалтара, так сказаць. Таму я гэтаму не давяраю»
– кажуць менчукі.
Да канца гэтага года насельніцтва Беларусі павінна аплачваць 75% ад агульнай сумы
Аднак сёння генеральны дырэктар прадпрыемства «Менская гарадская жыллёвая гаспадарка» Віталь Смірноў канстатаваў, што спажыўцы ўжо цяпер плацяць больш за 60% ад іх сабекошту. Адкуль узяліся гэтыя лічбы?
«Тыя лічбы, якія прад'яўляе нам сістэма ЖКГ – яны неадэкватныя. Менавіта таму нельга сказаць, плацім мы зараз 60%, 70, 80, ці будзем мы плаціць 100% у будучыні або плацім мы іх ужо цяпер», – лічыць былы работнік ЖКГ Павел Спірын.
Заплацяць усе
Толькі планавае падвышэнне коштаў на паслугі ЖКГ да стопрацэнтнага аплачвання – усяго на пяць даляраў штогод – абяцаў падчас «парламенцкіх выбараў» Лукашэнка. Аднак і ў гэтым выпадку – з агаворкай.
«Той, хто можа плаціць, павінен плаціць, будзе плаціць. Той, хто павінен, вы згодныя? Нават 150», – казаў Лукашэнка.
Павінны заплаціць немалыя грошы за камунальныя паслугі беларусы і ў наступным месяцы, калі прыйдуць разлікі за студзень – месяц з вялікімі маразамі, які пацягне за сабой і вялікія рахункі за ацяпленне. Праўда, цягам сямі дзён ўлады будуць вырашаць, як палягчаць такую фінансавую нагрузку і размяркоўваць гэтую суму на вясновыя квіткі.