У Швецыі гатэльны нумар пабудавалі прама на дрэве

Домік знаходзіцца на вышыні 10 метраў над зямлёй.

Працягнуўшы слаўную традыцыю домікаў на дрэве, архітэктурнае бюро Snøhetta пабудавала на вышыні 10 метраў над зямлёй «Сёмы пакой» (The 7th Room) для шведскага Treehotel. Архітэктары максімальна наблізілі домік да навакольнай яго прыроды, сцёршы усе межы паміж унутранай прасторай і унікальным лясным ландшафтам: вялізныя вокны, «сеткаватая» тэраса і дрэва, што расце прама з хаткі, піша onliner.by.

Кабіну на верхавінах дрэў трымаюць 12 калон: гэта зроблена для таго, каб знізіць нагрузку на ствалы. Такая канструкцыя стварае адчуванне вышыні, бязважкасці і адначасова надзейнасці. Фасад доміка абліцаваны абпаленымі хваёвымі дошкамі.

Знаёмства з «Сёмы пакоем» пачынаецца з таго моманту, як вы заўважаеце домік у сасновым лесе, што спачатку даволі няпроста. Адна з цікавых дэталяў — гэта «дно» доміка: яго ўпрыгожвае велізарны чорна-белы адбітак, на якім намаляваныя верхавіны дрэў, якія цягнуцца да неба.

У домік госці падымаюцца па лесвіцы, а для іх багажу прадугледжаны невялікі ліфт. Празрыстыя сцены і вокны да падлогі сціраюць межы паміж лаундж-зонай і адкрытай тэрасай. А з гэтых вялізных вокнаў у яснае надвор'е ёсць нядрэнны шанец ўбачыць паўночнае ззянне. Зрэшты, гэтак жа, як і з мансардных вокнаў у спальнях.

Адкрытая тэраса размясцілася пасярэдзіне дома, паміж двума спальнямі, а прама з двухслойнай сеткі, што замяняе падлогу тэрасы, вырастае хвоя. Прастора плошчай 55 м2 прызначаная для размяшчэння пяці гасцей. Лаундж-зона, дзве спальні, тэраса на адкрытым паветры — усе памяшканні размешчаны на розных узроўнях вышыні, што робіць інтэр'ер доміка разнастайным і дынамічным. Агульная зона адпачынку размешчана на «ніжнім» узроўні, а спальні на 30 см вышэй — з ложкамі, убудаванымі ў падлогу.

Архітэктары з Snøhetta зрабілі акцэнт на аўтэнтычным інтэр'ерным дызайне гатэльнага доміка. Лаундж-зона абстаўленая мэбляй нарвежскага дызайнера Ханса Братруда. Свяцільня для «Сёмага пакоя» былі створаны спецыяльна кампаніяй Ateljé Lyktan. Лямпы зроблены з цёмнага бярозавага шпону, тэкстура і колер якога пераклікаюцца з аздабленнем доміка.