Па суботах школьнікі будуць займацца па-новаму

У Мінадукацыі хочуць прыцягнуць педагогаў-прадметнікаў да работы з вучнямі ў суботу.

Па суботах школьнікі будуць займацца па-новаму. Міністр адукацыі падпісаў новы загад. На суботу перанясуць кансультацыі бацькоў з настаўнікамі і, магчыма, факультатывы. Акрамя таго, міністр адукацыі Ігар Карпенка заявіў, што ў суботу з дзецьмі ў школах будуць працаваць і настаўнікі-прадметнікі. Яны, са слоў Карпенкі, часта ўхіляюцца ад работы з вучнямі.

Ігар Карпенка падкрэсліў, што ўзаемадзеянне настаўнікаў-прадметнікаў з бацькамі зведала ўсебаковае вывучэнне, піша БелТА.

— Такая форма, як кансультацыі з бацькамі ў пытаннях навучання дзяцей, выносіцца на шосты школьны дзень, бо функцыя бацькоў у адукацыйным працэсе вельмі важная, — адзначыў міністр падчас наведвання Гацукоўскай сярэдняй школы ў Слуцкім раёне. — Ці павінны, напрыклад, бацькі рашаць за дзіця задачы, якія да таго задаюць па матэматыцы? Не, не павінны. Калі ў дзіцяці не атрымліваецца, бацькі павінны праінфармаваць аб гэтым настаўніка, правесці з ім кансультацыю, каб агульнымі намаганнямі развязаць праблему разумення дзіцем таго ці іншага матэрыялу.

З ягоных слоў, педагогі, якія выкладаюць розныя навучальныя прадметы, часта ўхіляюцца ад удзелу ў шостым школьным дні. Міністр мяркуе, што яны павінны ў гэты дзень працаваць з дзецьмі. Мяркуецца, што на суботу перанясуць і факультатывы для вучняў 9-11-х класаў. На думку Міністэрства адукацыі, гэта разгрузіць асноўны вучэбны тыдзень старшакласнікаў. Таксама Карпенка выказаўся за тое, каб у будучыні на суботу перанесці і факультатывы для вучняў 5-9-х класаў.

Міністр падкрэсліў, што новы дакумент не вызначае пералік канкрэтных мерапрыемстваў або работ, неабходных для правядзення ў шосты школьны дзень. Гэта будзе знаходзіцца ў кампетэнцыі ўстаноў адукацыі. Менавіта ў школах будуць вызначаць і тое, як рацыянальна прыцягнуць настаўнікаў-прадметнікаў.

— Педкалектыў павінен распрацаваць праграму шостага школьнага дня, расклад у адпаведнасці з гігіенічнымі патрабаваннямі, з нарматыўнай базай і рацыянальна размеркаваць кірункі працы. Напрыклад, на адным тыдні гэта могуць быць кансультацыі, на наступным — паездка ў прафесійна-тэхнічную навучальную ўстанову, далей адбудуцца спартовыя спаборніцтвы або творчыя конкурсы. Аб гэтым трэба сур'ёзна інфармаваць бацькоў, каб можна было арганізаваць нейкія супольныя мерапрыемствы, — сказаў ён.

Як раней паведамлялася, згодна з апошнімі зменамі Мінадукацыі дзеці змогуць хадзіць у школу з 5 гадоў. Такім чынам будзе змененая норма аб тым, што першакласніку павінна быць абавязкова 6 гадоў.