МЗС Беларусі - Літве: Усё вам не падабаецца
11- 19.01.2017, 18:33
- 11,976
Беларускі МЗС у дзёрзкай манеры пракаментаваў словы міністра замежных спраў Літвы Лінаса Лінкявічуса аб БелАЭС.
Літва робіць усё, каб дэзавуяваць высновы і самую місію SEED МАГАТЭ, якая цяпер заканчвае сваю працу ў Беларусі, заявілі ў беларускім МЗС. Так там пракаментавалі словы міністра замежных спраў Літвы Лінаса Лінкявічуса аб тым, што Беларусь запрасіла місію МАГАТЭ для вывучэння сітуацыі на БелАЭС не ў поўным аб'ёме.
«Мы вельмі ўстурбаваныя тым, што Беларусь выбарачна выкарыстоўвае стандарты ядзернай бяспекі. Гэта непрымальна, — адзначыў Лінкявічус. — Беларусь прапусціла ацэнку пляцоўкі для будаўніцтва і запрасіла місію МАГАТЭ SEED, якая, хутчэй за ўсё, абмяжуецца толькі ацэнкай дызайну электрастанцыі». Літоўскі міністр прагназуе, што ўлады затым распаўсюдзяць толькі пазітыўныя вынікі працы місіі, увёўшы ў зман сваё грамадства і іншыя краіны. На думку Лінкявічуса, такі падыход Менска азначае, што яму ёсць што хаваць.
На просьбу tut.by заяву літоўскага міністра пракаментавалі ў МЗС Беларусі. Там нагадалі, што прагназавалі такую рэакцыю Вільні на брыфінгу на мінулым тыдні.
— На жаль, добрыя навіны нашым літоўскім партнёрам не вельмі патрэбныя. Або, скажам так, ніякая навіна пра Беларускую АЭС не будзе для іх дастаткова добрай. У гэтым выпадку гэта відавочна, як ніколі. За дзень да прэс-канферэнцыі кіраўніцтва місіі МАГАТЭ, не чакаючы яе высноў, не даючы шанцу выказацца экспэртам, якія сёння занятыя падрыхтоўкай выніковых дакументаў, літоўская старана робіць усё, каб дэзавуяваць высновы і самую місію Агенцтва.
У МЗС Беларусі зазначаюць, што нагодай для выказвання Лінкявічуса стаў «нейкі ліст генеральнага дырэктара МАГАТЭ, які ім не падаецца і не цытуецца».
— Нельга ж лічыць цытатай спасылку на нейкіх «прадстаўнікоў МАГАТЭ», якія, са слоў літоўскай стараны, пацвердзілі нейкія асцярогі Вільні ў дачыненні да фармату місіі?
Акрамя таго, Мірончык звяртае ўвагу, што кіраўнік МЗС Літвы «апануе беларускай старане, якая нібыта заяўляе, што фармат місіі вызначаецца не ёю, а Агенцтвам». На справе ж, дадаюць у МЗС Беларусі, Менск каментаваў не фармат місіі SEED, а яе персанальны склад і той факт, што Беларусь не пярэчыла супраць гэтага складу.
— Як бачыце, літоўская старана выкарыстоўвае просты прыём: зняпраўджвае заявы, якія сама прыпісвае апанентам.
У беларускім МЗС паўтарылі сваю пазіцыю пра тое, што ўсе павінны паважаць «аўтарытэт і меркаванне міжнародных структур, якія прафесійна працуюць у гэтым кірунку».
— Давайце дамо экспэртам МАГАТЭ і беларускім спецыялістам спакойна скончыць сваю працу. Упэўнены, што заўтра яны адкажуць на ўсе пытанні.
13 студзеня стала вядома аб будучым візіце ў Беларусь місіі МАГАТЭ для ацэнкі праектавання пляцоўкі АЭС з улікам замежных падзей (місіі SEED). У МЗС Беларусі падкрэслілі, што запрашэнне такіх місій — добраахвотная ініцыятыва Менска для падвышэння даверу да нашай першай АЭС і крок насустрач пажаданням Літвы.