Футбаліст нацыянальнай каманды Беларусі перайшоў з украінскага клуба ў расейскі

Міхаіл Сівакоў, які пакінуў Луганскі «Світанак», правёў першы матч у складзе расейскага «Арэнбурга».

19 студзеня ў турэцкім Белеку ў сваім дэбютным паядынку за новы клуб абаронца футбольнай нацыянальнай каманды Беларусі Міхаіл Сівакоў гуляў разам з яшчэ двума беларусамі - галкіперам Аляксандрам Гутарам і паўабаронцам Паўлам Няхайчыкам супраць «Кайрата», паведамляе БелТА.

Беларускія футбалісты, якія правялі на полі першую палову гульні, не змаглі дапамагчы арэнбуржцам дамагчыся станоўчага выніку - таварыская сустрэча скончылася значнай перамогай казахстанскага клуба з лікам 3:0.

Футбалісты «Арэнбурга» ў гэтым сезоне дэбютавалі ў расейскай прэм'ер-лізе. Пасля першай часткі чэмпіянату Расеі ФК «Арэнбург» займае 14-е месца сярод 16 каманд, набраўшы ў 17 праведзеных матчах 12 балаў (2 перамогі, 6 нічыіх, 9 паразаў; розніца мячоў - 11-21).

Расейскае першынство адновіцца ў пачатку вясны - 4 сакавіка «Арэнбург» прыме на сваім полі суседа ў турнірнай табліцы тульскі «Арсенал», які таксама мае ў сваім актыве 12 балаў. Сёння футбалісты «Арсенала» таксама правялі кантрольны паядынак у Белеку, згуляўшы ўнічыю з удзельнікам Лігі чэмпіёнаў балгарскім клубам «Лудагорац» - 1:1. У складзе тульскай каманды выступае былы гулец барысаўскага БАТЭ Анры Хагуш.