Беларусь насуперак пярэчанням Масквы выдасць блогера Азербайджану

Аляксандр Лапшын можа абскардзіць гэтую пастанову.

Генеральная пракуратура Беларусі прыняла пастанову аб экстрадыцыі ў Азербайджан Аляксандра Лапшына, які мае грамадзянства РФ і Ізраіля, піша interfax.ru.

Начальнік аддзела інфармацыі Генпракуратуры Беларусі Пётр Кісялёў удакладніў, што Лапшын сам або праз адваката можа абскардзіць гэтую пастанову.

Следчае ўпраўленне ў справах аб цяжкіх злачынствах Генпракуратуры Азербайджана распачало крымінальную справу паводле артыкулаў «Неаднаразовыя публічныя заклікі, накіраваныя супраць дзяржавы» і «Незаконнае перасячэнне дзяржаўнай мяжы Азербайджана, здзейсненае групай асоб паводле папярэдняй змовы або арганізаванай групай альбо з ужываннем гвалту або з пагрозай яго прымянення» Крымінальнага кодэкса Азербайджана. Гэтыя артыкулы прадугледжваюць пакаранне ў выглядзе пазбаўлення волі на тэрміны ад 5 да 8 гадоў.

Паводле версіі Баку, Лапшын без атрымання афіцыйнага дазволу азербайджанскага боку ў красавіку 2011 года і кастрычніку 2012 года наведваў Карабах, парушыўшы палажэнні законаў «Аб дзяржаўнай мяжы Азербайджанскай рэспублікі» і «Аб пашпартах». Акрамя таго, у сваіх зваротах ад 6 красавіка і 29 чэрвеня 2016 года Лапшын выступіў з заклікамі прызнаць незалежнасць самаабвешчанага рэжыму Нагорна-Карабахскага рэгіёну.

16 снежня 2016 года стала вядома, што Лапшын быў затрыманы ў Беларусі на патрабаванне Азербайджана.

Кіраўнік МЗС РФ Сяргей Лаўроў заявіў, што Масква выступае супраць выдачы Беларуссю Лапшына ўладам Азербайджана.