Экспарт калійных угнаенняў скараціўся больш чым на чвэрць

Экспарт калійных угнаенняў знізіўся ў грашовым выражэнні на 27,6% у студзені-лістападзе 2016 года ў параўнанні з аналагічным перыядам 2015-га.

Пра гэта піша БелаПАН, спасылаючыся на звесткі афіцыйнай статыстыкі.

У грашовым выражэнні экспарт калійных угнаенняў за 11 месяцаў мінулага года склаў 1,83 млрд. даляраў.

У фізічным выражэнні экспарт калійных угнаенняў склаў у студзені-лістападзе 5,1 млн. тон (у пераліку на 100% дзейнага рэчыва) і скараціўся на 2,2%.

Непрапарцыйнае зніжэнне экспарту ўгнаенняў у фізічным і грашовым выражэнні абумоўлена тым, што сярэдні кошт тоны экспартуемых угнаенняў у студзені-лістападзе 2016-га знізіўся ў параўнанні з аналагічным перыядам 2015-га на 26% да 358 даляраў за тону (у пераліку на 100% дзейнага рэчыва).

Кіраўніцтва «Беларуськалія» бачыць некалькі прычын падзення цэн на сусветным рынку хлоркалію ў 2016 годзе.

«Крызісныя з'явы на сусветным рынку калію, нізкая пакупніцкая здольнасць нашых асноўных заказчыкаў, пазней падпісанне некаторых асноўных кантрактаў прывялі да зніжэння кошту калійных угнаенняў на замежных рынках», — адзначыў гендырэктар «Беларуськалія» Іван Галаваты, падводзячы вынікі ў канцы 2016 года ў газеце «Калійшчык Салігорска», якую выдае прадпрыемства.