Супрацоўнік банка: Чакаецца рост банкруцтваў
6- 20.01.2017, 18:10
- 33,797
Краіне тэрмінова неабходныя рэальныя эканамічныя рэформы.
Складаная эканамічная сітуацыя сёлета будзе толькі пагаршацца. Асабліва востра гэта адчуюць ў малых гарадах. Тым не менш улады, як і людзі застылі ў чаканні нейкага цуду ці паслясвяточнага падарунка.
«Ні таго, ні іншага не будзе без агульных намаганняў усяго грамадства», - упэўнены спецыяліст у банкаўскай сферы, паведамляе «Радыё Рацыя».
— Расце доля крэдытаў, якія не вяртаюцца. Крэдыты выдаюцца вельмі асцярожна. Выдаюцца толькі плацежаздольным прадпрыемствам. Але тыя крэдыты, якія былі выдадзеныя раней, яны-то і цягнуць гэты паказчык уверх. Так званыя таксічныя актывы ў банках растуць. Ніхто ратаваць прадпрыемства не збіраецца, асабліва невялікія ў невялікіх гарадах. Не можаце самі сябе забяспечыць — тады зачыняйцеся.
Са слоў супрацоўніка банка, неабходныя эканамічныя рэформы для паляпшэння сітуацыі і стварэння спрыяльнага інвестыцыйнага клімату. Але пакуль, на ягоную думку, не прадбачыцца ні таго, ні іншага.