Пяць фактаў пра гурт Navi, які паедзе на «Еўравізію»

Еўравізія-2017 пройдзе ў Кіеве з 9 да 13 траўня.

20 студзеня стала вядома, што нашу краіну на чарговым конкурсе «Еўравізіі» ў траўні будзе прэзентаваць малады гурт Navi з песняй «Гісторыя майго жыцця». «Наша Ніва» сабрала цікавыя факты пра калектыў.

Ён з Глыбокага, яна — з Менска

Гурт Navi — гэта Арцём Лук’яненка і Ксенія Жук. Яму 24 гады, ёй 25. «Яна — куля, ён — спакойны, разважлівы», — так расказвае мама Ксеніі Наталля Жук.

Арцём нарадзіўся ў горадзе Глыбокае, скончыў беларускамоўную гімназію №3, там яго мама выкладала біялогію. Потым Арцём вучыўся ў БДУ на журналістыцы, працаваў на радыё «Сталіца».

Ксенія нарадзілася ў сталіцы, яе бацькі вучыліся ў Педагагічным універсітэце, удзельнічалі ў тэатральнай трупе. Ксенія выкладае вакал для дзяцей у школе.

І Ксенію, і Арцёма аддавалі ў школе ў клас фартэпіяна, толькі Арцём псіхануў і сышоў. Новае захапленне музыкай пачалося ўжо ў 12 гадоў, са спробаў навучыцца граць на гітары. А вось Ксенія гітару не асвоіла, хоць і просіць Арцёма навучыць яе.

Знаёмства на Дзень святога Валянціна

Пазнаёміліся Арцём і Ксенія даволі выпадкова, гэта адбылося 14 лютага 2013 года. Ксенія прыехала на рэпетыцыйны пункт, дзе акурат іграў Арцём. Хлопец кажа, што яму адразу прыйшлася даспадобы непасрэднасць Ксеніі, яна папрасіла памацаць кудзеркі Арцёма, пераканацца, што яны сапраўдныя. «Я сказаў «вітаю, можа, праспяваем разам», — кажа Арцём.

На той час і ў Арцёма, і ў Ксеніі былі іншыя праекты. Аднак Ксенія кажа, што ў гурце Sonika не адчувала сябе, выконвала тое, што яе прасілі. Праз нейкі час Лук’яненка напісаў тэкст «Абдымі мяне» і прапанаваў Ксеніі праспяваць яго разам. Гэта быў першы хіт новага гурту. Цікава, што ў Расеі назву песні перакладалі прыкладна як «Абкуры мяне».

Дарэчы, назва Navi нічога не значыць. Можна сказаць, што гэткі набор літар. Хаця па-ангельску сугучнае «navy» азначае «флот». А пазней Арцём з Ксеніяй даведаліся, што па-грузінску navi азначае «лодка», дый па-італьянску «nave» — лодка, карабель.

Аб’ездзілі ўсю краіну з «Мовай нанова»

Арцём і Ксенія не проста спяваюць па-беларуску, але яшчэ і актыўна прапагандуюць беларускую мову. Гурт падтрымлівае праект «Мова нанова». Прычым не толькі ў Менску, але і ў меншых гарадах, як Маладзечна, Бабруйск, Горадня. «Мова становіцца трэндам, і гэта радуе», — дзеліцца Ксенія Жук.

«Мы ездзілі на канцэрт у Маскву і там палову песняў спявалі па-беларуску. Масквічы ўспрынялі нас абсалютна адэкватна. Не перадаць тыя пачуцці, калі яны нам пісалі: «Вы нас сагрэлі». А выступы акурат праходзілі ў лютыя маразы».

Не першая спроба адбору

У 2016 годзе Navi ўжо спрабавалі патрапіць у фінал «Еўравізіі» з песняй «Гэта зямля». Але перавага была аддадзеная пратэжэ Дробыша Ivan-у. Праўда, у Швецыі Іван не змог нават выйсці ў фінал. «Тут, відаць, нават не творчасць, а грошы, рэпутацыя і так далей, але падтрымка была неймавернай», — на эмоцыях казаў Арцём Лук’яненка.

Navi ў той год сапраўды падтрымлівалі вельмі многія.

Сумесныя праекты з Грышкаўцом, перапіска з Джыліян Андэрсан

Хай Navi і спяваюць па-беларуску, але ў Расеі іх таксама няблага ведаюць. Напрыклад, Navi выступалі на юбілейным вечары Дзіяны Арбенінай (таксама выхадцы з Беларусі) у Маскве. Выступалі разам у Магілёве. Выступалі на разагрэве ў Сяргея Бабкіна.

У Гомелі ў адным невялікім бары іх выступ выпадкова пабачыў вядомы расейскі драматург Яўген Грышкавец. «Яны спявалі па-беларуску і па-расейску. Гэта было настолькі неймаверна, што я забыўся, што знаходжуся ў пабе, было ўражанне вялікага канцэрту». Пасля гэта гурт разам з Грышкаўцом запісаў песню «Колыбельная». У планах ёсць запісаць сумесны трэк і на беларускай мове.

У 14 гадоў Ксенія Жук пазнаёмілася са славутай амерыканскай актрысай Джыліян Андэрсан (агент Скалі з «Сакрэтных матэрыялаў»). Адбылося гэта на фестывалі Giffoni Film у Італіі. Ксенія расказала, што спявае. Праз два месяцы з ёй звязваліся агенты Андэрсан з просьбай пераслаць матэрыял. Дзяўчына пасля гэтага яшчэ перапісвалася з Андэрсан, размаўляла па тэлефоне.

Ксенія Жук кажа, што матэрыял быў яшчэ сыры, таму нічога не выйшла. Цяпер яна і Арцём Лук’яненка больш упэўненыя ў сабе і сваёй творчасці.