У свеце прайшлі акцыі супраць вайны ва Украіне
4- 21.01.2017, 20:49
- 11,176
У Санкт-Пецярбургу актывісты правялі акцыю «Спыні вайну Пуціна ва Украіне 3.0».
Расейцы сабраліся з плакатамі і паветранымі шарамі жоўтага і блакітнага колеру. Актывіст руху «Салідарнасць» прыйшоў з таблічкай «За вашу і нашу свабоду», піша pravda.com.ua.
Таксама акцыя адбылася ў суботу ў Аўстраліі і Грузіі.
Акцыя за спыненне агрэсіі РФ супраць Украіны адбылася на Майдане Незалежнасці ў Кіеве ў суботу.
Блізу 50 чалавек сабраліся ў цэнтры сталіцы пад лозунгам «#Stop Putin's War in Ukraine».
Ля Стэлы Незалежнасці прайшоў невялікі мітынг, падчас якога выступілі кіеўскія грамадскія актывісты, сваякі вайскоўцаў, якія знаходзяцца ў закладніках у баевікоў.
Удзельнікі мітынгу трымалі дзяржаўныя сцягі Украіны, сцягі «Народнага Руху Украіны», партыі «Сіла людзей», крымскататарскі сцяг, а таксама плакаты з надпісамі лозунгу акцыі «#Stop Putin's War in Ukraine».
Такія акцыі запланаваныя ў многіх гарадах свету і Украіны.
Сярод галоўных патрабаванняў актывістаў - вывад з тэрыторыі Украіны ўсіх расейскіх акупацыйных войскаў, а таксама вяртанне назад у Расею ўсёй зброі і вайсковай тэхнікі, узмацненне назіральнай місіі АБСЕ да 24 гадзін у дзень сем дзён у тыдзень і допуск місіі АБСЕ на частку расейска-ўкраінскай мяжы, якую Украіна часова не кантралюе.
Акрамя таго, актывісты патрабуюць вызваліць грамадзян Украіны, якія незаконна ўтрымліваюцца пад арыштам як на тэрыторыі Расеі, так і ў Крыме паводле палітычна матываваных і сфабрыкаваных абвінавачванняў.