«Лісты шчасця» ад падатковай атрымалі ўжо 106 тысяч менчукоў

Улады прадаўжаюць павялічваць войска раззлаваных беларусаў.

Паведамленні на выплату падатку на «дармаедства» атрымалі блізу 106 тысяч менчукоў, паведаміў начальнік інспекцыі Міністэрства падаткаў і збораў Менску Андрэй Сабалеўскі ў інтэрв'ю газеце «Мінскі кур'ер».

«Больш за 11 000 з іх падалі дакументы аб тым, што яны не павінны кампенсаваць казне фінансавыя сродкі, і гэтыя звесткі ўлічылі. Па вялікім рахунку, наша задача палягае ў тым, каб у агульны спіс не траплялі людзі, якія не з'яўляюцца сацыяльнымі ўтрыманцамі. Хоць памылкі, вядома, здараюцца. Падаткавікі ад іх не застрахаваныя: працэс пакуль што не настолькі добра апрабаваны. Але мы рухаемся да гэтага», - сказаў начальнік сталічнай інспекцыі МПЗ.

З ягоных слоў, ад выплаты падатку ў бюджэт горада паступіла блізу 2,2 мільёна рублёў. «Тэрмін выплаты так званага падатку на дармаедства за 2015 год - не пазней за 20 лютага 2017-га. Таму некаторым менчукам яшчэ трэба паклапаціцца аб тым, каб вырашыць гэтую задачу», - падкрэсліў Андрэй Сабалеўскі.

Пры гэтым ён падкрэсліў, што пасля таго, як чалавек атрымаў паведамленне аб неабходнасці выплаціць збор на фінансаванне дзяржвыдаткаў, у яго ёсць 30 каляндарных дзён, каб давесці адваротнае. Для гэтага трэба прадставіць у раённую інспекцыю МПЗ дакументы або тлумачэнні, якія пацвердзяць, што гэты грамадзянін - не аплатнік збору.

Даведацца аб унясенні ў спісы «дармаедаў» можна будзе не толькі з заказнога ліста ад падатковай. Са слоў Сабалеўскага, пры налічэнні падатку за 2016 год пра гэта можна будзе даведацца ў асабістым кабінеце на сайце МПЗ.

«Дзякуючы асабістаму кабінету на партале фізічная асоба можа таксама падаць дакументы, якія пацвярджаюць, што чалавек не ўваходзіць у спіс плацельшчыкаў збору. Ездзіць у падатковую інспекцыю з дакументамі і марнаваць час на стасункі са спецыялістам не давядзецца», - распавёў ён.

Для таго, каб адкрыць асабісты кабінет, неабходна звярнуцца з пашпартам ва ўсякі падатковы орган, у тым ліку і не па месцы рэгістрацыі.

Нагадаем, што 17 лютага а 18-00 на Кастрычніцкай плошчы Менска пачнецца Марш раззлаваных беларусаў з патрабаваннем скасавання дэкрэта аб «дармаедах».