Шэсць міфаў аб вадзе, у якія пара перастаць верыць

У сацыяльных сетках распаўсюджваюцца шматлікія і часам супярэчлівыя звесткі аб вадзе.

Lifehacker.ru разбірае папулярныя памылкі і высвятляе, калі, у якім выглядзе і колькасці ўжываць ваду.

1. Трэба выпіваць восем шклянак за дзень

Формула васьмі шклянак вандруе з часопіса ў часопіс. Гэта да абсурду спрошчанае правіла, апублікаванае ў замежнай прэсе яшчэ ў 1945 годзе, прадугледжвае, што спажытая (у тым ліку разам з прадуктамі харчавання) за дзень вадкасць будзе эквівалентная прыкладна двум літрам вады. Ваду можна спажываць ва ўсякім выглядзе: у супе, соках, гародніне і садавіне, гарбаце. Але фразу «выпівайце восем шклянак вады за дзень» успрымаюць даслоўна.

Два літры — сярэдняя велічыня, прыдатная для здаровага дарослага чалавека, які не займаецца фізічнай працай. Мужчынам і жанчынам, спартоўцам і канторскім працаўнікам, жыхарам халодных і гарачых краін патрабуецца розная колькасць вады.

Лепш за ўсё арыентавацца на смагу. Хочаце піць — піце. Галоўнае — папоўніць страты вады, якая забяспечвае абмен рэчываў, што асабліва важна для асоб з залішняй вагой.

Піць ваду ў чыстым выглядзе таксама карысна. Адрозна ад сокаў, кавы ці малака, вада не змяшчае кафеіну, тлушчаў, вугляводаў ды іншых рэчываў, здольных нашкодзіць арганізму пры празмерным ужыванні.

2. Трэба піць бутэляваную ваду

Калі з-пад крана цячэ адпаведная санітарным нормам або прапушчаная праз фільтр вада, яе дастаткова загатаваць. Фільтр рэгулярна мяняйце.

Вытворцы вырабляюць дыстыляваную і мінеральную ваду. Дзякуючы змяшчэнню натрыю мінералку карысна ўжываць пры фізічных практыкаваннях. Але калі вада лекавая, яе нельга піць для наталення смагі.

3. Піць падчас ядзення шкодна

Смяхоцце, але так кажуць людзі, перакананыя ў карысці супоў і шкодзе есці хлеб сухама. Напраўду, запіваючы ежу вадой, мы дапамагаем страўніку засвойваць з'едзенае.

4. Піць падчас трэнінгу шкодна

Старыя савецкія фізкультурнікі часам кажуць, што выпітая падчас трэнінгу вадкасць павялічвае аб'ём крыві, прымушаючы сэрца здзяйсняць больш намаганняў падчас працы. У рэчаіснасці ўсё роўна наадварот. Пры страце вадкасці кроў гусцее. Гэта і абцяжарвае дзейнасць сэрцавай цягліцы. Дыетолагі і трэнеры раяць піць у кожны час трэнінгу, а таксама да і пасля яго. Галоўнае — не піць занадта шмат, але пра гэта ніжэй.

5. Нельга піць занадта шмат

Гэта сцвярджэнне — міф напалову. Тэзіс аб тым, што шмат піць - перашкода для схуднення, не мае пад сабой навуковых падстаў, бо мы памятаем, што вада забяспечвае наш метабалізм. Лішак вады выводзіцца з арганізма натуральнымі шляхамі. Калі арганізму ўласціва назапашваць вадкасць, звярніцеся да лекара.

Каб прычыніць арганізму шкоду вадой, трэба выпіць яе вельмі шмат, магчыма, нават супраць волі. Навукоўцы з Інстытута нэйрафізіялогіі і псіхічнага здароўя ў Мэльбурне сцвярджаюць, што пры спажыванні вады звыш нормы ў мозгу чалавека ўмыкаецца механізм, што гамуе глытальны рэфлекс.

Больш за тры літры на працягу гадзіны піць вельмі не рэкамендуецца, асабліва спартоўцам. Падчас трэнінгу з арганізма выдаляецца натрый. Яго нястача пры спажыванні вады прычыняецца да гіпанатрыеміі, пры якой вадкасць не выводзіцца з арганізма, а назапашваецца ў каморках.

6. Празмернае піццё дапамагае ў барацьбе з ВРВІ і падчас пахмелля

Шмат хто ведае, што падчас прастуднага захворвання трэба піць шмат вады, але не ўсе разумеюць, навошта. Сама сабой вада не лечыць грып і ВРВІ. Яна папаўняе страчаную падчас хваробы вадкасць, што таксама важна.

Падчас пахмелля вада патрэбна з гэтых жа прычын. Алкаголь інтэнсіўна выводзіць вадкасць з арганізма, таму нам трэба яе аднавіць.