Стартаваў збор сродкаў на выданне «Рэквіема паўстанцам 1863 года»
1- 22.01.2017, 21:41
- 10,321
У 154-ю гадавіну паўстання 1863 года пачаты збор сродкаў на кнігу-рэквіем.
У 1863 годзе ў Польшчы, Літве і Беларусі выбухнула нацыянальна-вызваленчае паўстанне. На тэрыторыі Літвы-Беларусі яго душыла 120-тысячнае расейскае войска, якому супрацьстаяла не больш за 15 тысяч інсургентаў, паведамляе nn.by.
Сотні з іх палеглі ў баях, былі расстраляныя або павешаныя паводле прысудаў вайскова-палявых судоў.
Тысячы былі высланыя на катаргу або вайсковую службу.
Агульныя страты Літвы-Беларусі дасягаюць 20 тысяч чалавек. Гэта былі найбольш адукаваныя, чынныя, «пасіянарныя» людзі...
Праз 154 гадоў мы зноў выконваем абавязак памяці і аддаем пашану паўстанцам, дзякуючы прафесару і прадстаўніку Гарадзенскай гістарычнай школы — Вячаславу Шведу.
Праца гісторыка «Рэквіем паўстанцам 1863-1864 (Гродзенская губерня)» ўжо гатовая і чакае сваёй публікацыі.
Прапанаваная кніга з'яўляецца рэквіемам студзеньскім паўстанцам Гарадзенскага паўстанцкага ваяводства, якое ўключала ў сябе сённяшнія Гарадзеншчыну, Берасцейшчыну, Беласток.
Нарысы апавядаюць аб удзельніках маніфэстацыйнага перыяду 1861-1862 гадоў, распаўсюджвальніках газэты «Мужыцкая праўда», аб удзельніках нелегальнай гарадзенскай рэвалюцыйна-дэмакратычнай арганізацыі, пра камандзіраў партызанскага руху і гарадзенскіх паўстанцаў-гімназістаў, памагатых паўстанцаў, аб дэпартаваных з спаленых шляхецкіх сяліб і вёсак.
У кнізе падаюцца спісы партызанскіх аддзелаў і страчаных паўстанцаў. Асобныя нарысы прысвечаныя Кастусю Каліноўскаму («чырвонаму») і Віктару Старжынскаму («беламу»).
У кнізе таксама пазначаныя месцы, звязаныя з паўстанцамі.
Падтрымаць праект можна на платформе Talaka.by.