Пад Лагойскам аўтамабіль ДАІ адправіў у кювет пазадарожнік

Пра аварыю паведамілі адразу два відавочцы.

Чарговая аварыя з удзелам аўтамабіля ДАІ адбылася на трасе М3 у Лагойскім раёне, недалёка ад Плешчаніц, у мінулую нядзелю. Усё абышлося без ахвяр толькі па шчаслівай выпадковасці, піша abw.by.

Пра аварыю паведамілі адразу два відавочцы.

«У ДТЗ трапіў службовы аўтамабіль ДАІ. Праязджаў побач, у кювеце знаходзіліся нейкі пазадарожнік і службовы аўтамабіль ДАІ Volkswagen Polo», - паведаміў Руслан.

Неўзабаве пасля гэтага Вольга напісала, што ўсё адбылося ў яе на вачах: «Ехалі трасай М3 у бок Менска, было блізу 15.00. Аўтамабіль ДАІ рэзка спыніўся на паласе, стварыўшы перашкоду для руху аўто. Наступны за ім кіроўца хацеў яго аб'ехаць па сустрэчнай паласе, а першы ў гэты час рэзка сышоў на разварот. У выніку абодва ў кювеце. Сфатаграфаваць не паспелі, былі з дзіцем. Відавочная віна ДАІ. Маячкі на службовым аўтамабілі не былі ўключаныя, гэта я з усёй адказнасцю заяўляю».

Пры гэтым яна дадала: «Нас ад іх раздзяляла машын пяць. І кожны з нас мог апынуцца на месцы кіроўцы аўто, які вылецеў у кювет (гэта быў пазадарожнік або «паркетнік» цёмнага колеру). Там яшчэ па сустрэчнай паласе ехала фура. Некалькі секунд - і магло б быць усё нашмат больш сур'ёзна».

У ДАІ пацвердзілі факт ДТЗ: «Блізу 15.00 на 58-м кіламетры трасы Менск - Віцебск, у Лагойскім раёне, адбылося спадарожнае сутыкненне аўтамабіля Nissan Terrano і службовага аўтамабіля ДАІ Volkswagen. У выніку ДТЗ пасажырка аўтамабіля Nissan, пенсіянерка, атрымала траўму кісткі і пасля надання меддапамогі была адпушчаная дахаты, шпіталізацыя ёй не спатрэбілася. Пасажырка знаходзілася на заднім сядзенні і рамянём бяспекі прышпіленая не была. Па факце ДТЗ праводзіцца праверка».

Нагадаем, самай скандальнай за апошні час стала аварыя з удзелам цяпер ужо былога начальніка Баранавіцкай ДАІ, які, будучы п'яным за стырном, на смерць збіў маладую жанчыну.

Пасля гэтага міністр МУС Шуневіч адправіў усіх супрацоўнікаў ДАІ на праверку на дэтэктары хлусні. Нягледзячы на масавыя правалы, пазней міністр заявіў, што заваліўшых праверку звальняць з ДАІ не будуць.