Беларускія астраномы патрапілі ў Кембрыджскі падручнік
3- 26.01.2017, 10:49
- 17,958
Кадры гэтых фатографаў раней ужо публікаваліся ў салідных выданнях, прысвечаных астрафатаграфіі.
Здымкі беларускіх фатографаў Юрыя Гарачкі, Міхаіла Абгарана і Канстанціна Марозава апублікавалі ў кнізе «Зняць Месяц» (Shoot the Moon) выдання Кембрыджскага ўніверсітэта.
«На днях кожны ўдзельнік нашай каманды атрымаў пакет, — напісаў Юрый на форуме belastro.net. — У пакетах была кніга Shoot The Moon, а ў кнізе былі мы».
Кніга Shoot the Moon прысвечана астранамічнай фотаздымцы Месяца. У ёй сабраны практычныя парады аб тым, як фатаграфаваць спадарожнік Зямлі рознымі спосабамі.
Адзін з раздзелаў апісвае здымкі са стэрэаэфектам, якія выглядаюць трохмернымі, калі глядзець на іх у анагліфічныя акуляры з чырвоным і блакітным шклом.
Для атрымання 3D-эфекту трэба сфатаграфаваць Месяц з двух аддаленых кропак, што можа быць вельмі няпроста. Беларускія фатографы з каманды Аstronominsk выкарыстоўвалі для гэтага эфект лібрацыі — уяўнага вагальнага руху Месяца пры назіранні з Зямлі.
Фатографы зрабілі мноства здымкаў праз тэлескоп, а пасля пры дапамозе спецыялізаванага праграмнага забеспячэння стварылі стэрэамалюнак.
Кадры гэтых фатографаў раней ужо публікаваліся ў салідных выданнях, прысвечаных астрафатаграфіі.