Экс-футбаліст менскага «Дынама»: У Славакіі людзі жывуць лепш, чым у Беларусі

Валерый Патароча параўнаў узровень жыцця ў Славакіі і Беларусі.

Экс-паўабаронца менскага «Дынама» і светлагорскага «Хіміка» Валерый Патароча апавёў «Прэсболу» пра пераезд у клуб другога славацкага дывізіёна «Партызан» (Бардзееў).

– Як толькі з'явіўся варыянт са Славакіяй, адразу пагадзіўся на пераезд. Бацькі падтрымалі. Няведанне мовы і чужая краіна не бянтэжылі. Ну, што тут такога? Прыехаў і прайшоў трохдзённы прагляд. За гэты час узяў удзел у двухбаковай гульні, правёў некалькі трэніровак. Коўч паглядзеў на мяне і сказаў, што падыходжу.

Футбол у іх прыкладна такі самы, як у нас. Праўда, хуткасці ў Славакіі вышэйшыя, ды і барацьбы больш. Часу на роздумы практычна няма, на поле трэба хутка прымаць пастановы. Чэмпіянат, у якім я выступаю, – аналаг нашай першай лігі. Толькі вось у Славакіі ёсць дзяленне на зоны, ліга цалкам прафесійная. У славацкім міноры наяўнасць легіянераў у складзе – звычайная справа. Думаю, гэта станоўчы момант для развіцця футболу ў краіне. Ды і канкурэнцыя ў камандзе павышаецца. Калі ацэньваць узровень гульні, то ў Славакіі, думаю, ён вышэйшы, чым у Беларусі.

Мая каманда «Партызан» гуляе ў зоне «Усход» і пасля першага кола займае другое месца. Сёлета клубу спаўняецца 95 гадоў, але мэты выйсці ў элітны дывізіён у нас нібыта няма. Зрэшты, мы ў любым выпадку гуляем на перамогу ў кожным матчы. Да сакавіка – спарынгі, а потым аднаўляецца чэмпіянат. Другое кола пачнем на новым стадыёне.

У Бардзееў я прыехаў у той час, калі ў чэмпіянаце было згуляна 5 ці 6 матчаў. Трэнер не рызыкнуў адразу кінуць мяне на поле. Ён даў час на адаптацыю і знаёмства са славацкім футболам. У першым коле я здавольваўся выхадамі на замену. У другой частцы чэмпіянату, спадзяюся, буду атрымліваць больш практыкі. Хочацца выходзіць на поле і гуляць. Кантракт у мяне яшчэ на паўтара года.

Мая славацкая знаходзіцца на пачатковым узроўні. Нешта разумею, магу задаць пару пытанняў. Увогуле, без ведання мовы дастаткова цяжка. Добра, што трэнер трохі разумее рускую. З партнёрамі маю зносіны недзе на англійскай, недзе на славацкай. Калі прыехаў, то ўвогуле нічога сказаць не мог. Было цяжкавата. Ды і пра краіну амаль нічога не ведаў.

Славакія – звычайная краіна. Прыгожыя гарады, горы. Людзі жывуць лепш, чым у Беларусі. Заробкі вышэйшыя, але ў футболе прыкладна такія самыя заробкі. Прадукты ў крамах каштуюць столькі сама, грамадскі транспарт, праўда, даражэйшы. Нармальна паесці ў Бардзееве можна за 5 еўраў, – сказаў Патароча.