Валютныя актывы банкаў апусціліся да мінімальнага з 2013 года ўзроўню

Камерцыйныя банкі не ў стане ўкладваць валютныя сродкі ў эканоміку краіны.

Паводле звестак Нацыянальнага банка РБ, актывы камерцыйных банкаў краіны (без уліку Банка развіцця) у замежнай валюце ў лістападзе знізіліся на 201,1 млн USD (1%) у параўнанні з кастрычнікам і склалі 20 278 млн USD.

Гэта мінімальнае значэнне гэтага параметру з канца 2013 года, піша select.by.

Падзенне валютных актываў у банкаў назіралася і ў лістападзе мінулага года, значыць, зніжэнне гэтых актываў у лістападзе носіць, відавочна, сезонны характар.

Валютныя патрабаванні камерцыйных банкаў да рэзідэнтаў РБ у лістападзе знізіліся ў параўнанні з кастрычнікам на 462,4 млн USD (2,4%) і склалі на 1 снежня 18 482,1 млн USD.

У той жа час патрабаванні банкаў да нерэзідэнтаў павялічыліся на 261,3 млн USD (17%) — да 1 795,9 млн USD. Гэта максімальнае значэнне для гэтага параметру з канца 2012 года, калі ў Беларусі адбыўся валютны крызіс. Рост гэтага параметру паказвае на тое, што ў банкаў няма магчымасці ўкласці валютныя сродкі ў беларускую эканоміку.

Нягледзячы на зніжэнне валютных актываў камерцыйных банкаў у даляравым эквіваленце, іх велічыня ў беларускіх рублях у лістападзе павялічылася на 942,8 млн BYN (2,4%) — да 39 986,2 млн BYN. Пры гэтым рублёвыя актывы банкаў у лістападзе таксама выраслі, але ўсяго на 673,4 млн BYN (2,8%) — да 25 121,5 млн BYN.

У выніку сумарныя валютныя і рублёвыя актывы камерцыйных банкаў РБ за лістапад павялічыліся на 1 616,2 млн BYN (2,6%) — да 65 107,7 млн BYN.

Патрабаванні да суб'ектаў гаспадарання — рэзідэнтаў РБ пры гэтым выраслі ўсяго на 426,7 млн BYN (1,3%) — да 34 523,2 млн BYN. А патрабаванні да фізічных асобаў падняліся на 64,7 млн BYN, дасягнуўшы на 1 снежня 7 178,6 млн BYN.

Патрабаванні да органаў дзяржаўнага кіравання выраслі ў большай ступені: на 489,3 млн BYN (6,9%) і дасягнулі 7 млн 566,3 BYN.

Патрабаванні камерцыйных банкаў да Нацбанку ў лістападзе знізіліся ў параўнанні з кастрычнікам, але нязначна: на 6,2 млн BYN (да 9 156,7 млн BYN). А патрабаванні камерцыйных банкаў да банкаў павялічыліся на 26,7 млн BYN — да 1 484,4 млн BYN. У лістападзе банкі нарасцілі і ўласныя сродкі, але ўсяго на 1,3 млн BYN — да 1 640,2 млн BYN.