Максім Валадзько: Радуе, што заўзятары хочуць нам верыць

Футбаліст каманды Беларусі пракаментаваў вынікі матчу з камандай Францыі.

Абаронца каманды Беларусі Максім Валадзько пракаментаваў паразу ад Францыі (1:2) у матчы кваліфікацыі ЧС-2018, піша сайт «Трыбуна»:

«Вынік даволі нядрэнны. Хоць, вядома, саступілі - гэта значыць вынік аўтаматычна дрэнны. Але ўлічваючы ўзровень каманды Францыі, вынік больш-менш нядрэнны. У другім тайме гаспадары аддалі ініцыятыву. Магчыма, яны хацелі проста захаваць пераможны лік. Але мы лепш дзейнічалі ў атацы, валодалі мячом. Нават зраўняць маглі ў канцы гульні.

Грызман? Натуральна, было няпроста гуляць супраць яго. Не проста ж так ён намінуецца на «Залаты мяч». Мбапэ, Коман - з усімі цяжка гуляць. Узровень, вядома, адчуваецца. Было няпроста.

- Заўзятары адзначаюць, што ўсім хочацца верыць у такую каманду як супраць Галандыі і Францыі. Падтрымаеш?

- Тое, што ім хочацца верыць, ужо як мінімум радуе, таму што да гэтага... Вось, дарэчы, Грызман ідзе. Спытаеце, як супраць мяне гуляць :). Увогуле, прыемна. Спадзяюся, што наступны адборачны цыкл пачнём з гульнёй такой якасці, як у матчах з Галандыяй і Францыяй. Толькі, спадзяюся, вынік прыйдзе ў гульні з больш слабымі камандамі і грандамі таксама», - сказаў Валадзько ў эфіры АБФФ-ТВ.