Ілля Сушко аб амерыканскім грамадзянстве: Я люблю Беларусь, амерыканцам станавіцца не хачу

Беларускі хакеіст развеяў усе чуткі наконт прыняцця грамадзянства ЗША.

Беларускі абаронца «Сідар-Рапідс Рафрайдэрс» (USHL) Ілля Сушко падзяліўся ўражаннямі ад знаходжання ў ЗША, піша сайт «Трибуна»:

- Якія ўмовы для трэніровак у вашым клубе?

- Распранальні, пляцоўкі, лёд - усё на ўзроўні. Калі нешта трэба, то табе дадуць, створаныя ўсе ўмовы для працы. Астатняе залежыць выключна ад цябе.

- У Беларусі хоць бы падобныя ўмовы сустракалі?

- Напэўна, салігорскі «Шахцёр» нічым не горшы. Можа, нават лепшы. Але галоўнае адрозненне працы ў тым, што ў ЗША пасля гульні або трэніроўкі не вядуць на вячэру ўсю каманду, як у Беларусі, а проста раздаюць піцу, кожны сам адпраўляецца дадому.

- У вольны час чым займаецеся?

- Калі шчыра, за месяц, што я тут жыву, быў толькі адзін выходны. Выспаўся, з'ездзілі з сям'ёй паглядзець горад, прайшліся па крамах. Астатні час праводжу дома.

- Не магу не спытаць пра магчымасць з часам прыняць амерыканскае грамадзянства. Што наконт гэтага скажаце?

- Не, выключана. Я люблю Беларусь, амерыканцам станавіцца не хочацца, нават такі варыянт не разглядаю.

- Якія заробкі ў клубе?

- У USHL гульцам наогул нічога не плацяць. Такім чынам, я жыву за кошт амерыканскай сям'і і тых грошай, якія мне пералічваюць бацькі, плюс тых, што сам назапасіў у Беларусі. Наогул, я асабліва грошы тут не марную. Толькі з хлопцамі можам кудысьці з'ездзіць у кавярню, нейкі кактэйль выпіць пасля трэніроўкі. Дадому прыязджаеш - там усё ёсць. Калі чагосьці не стае, скажаш - табе купяць.

- Па Беларусі за месяц не засумавалі?

- Засумавалі ўжо па сябрах, родных. А ўлічваючы тое, што, калі тут прачынаюся, у Беларусі вечар, не паспяваю толкам пагутарыць з роднымі. Але што зрабіць, трэба рухацца далей, прывыкаць да новага ладу жыцця. І расейскую мову, дарэчы, не забываю, усё ў гэтым плане добра, - сказаў Сушко.