Фірма «Сезам», якая будуе БелАЭС, стала банкрутам

«Росатом» купіць у бізнэсоўца Васілія Бойкі-Вялікага кампанію-выканаўцу «Сезам», вядомую інцыдэнтам з падзеннем корпуса рэактара для Беларускай АЭС.

Інжынірынгавая «дачка» «Росатома» - «Атомстройэкспорт» (АСЭ) абмяркоўвае магчымасць куплі кампаніі «Сезам», якая ўваходзіць у холдынг «Энергоатоминжиниринг» Васілія Бойкі-Вялікага, баючыся банкруцтва выканаўцы. Пра гэта гаворыцца ў апублікаваных дзяржаўнай карпарацыяй закупных матэрыялах, піша РБК. Згодна з ім «Росатам» абраў ацэншчыка Nexia Pacioli для правядзення аўдыту (due diligence) «Сезама», абмінаючы конкурсныя працэдуры.

Дзяржаўная карпарацыя абгрунтавала гэтую пастанову сціслымі тэрмінамі правядзення ўгоды: «правядзенне канкурэнтнай працэдуры куплі немагчымае, бо вынікі правядзення due diligence, патрэбныя для прыняцця пастановы аб набыцці акцый «Сезама», будуць вядомыя не раней за студзень 2018 года». Гэты факт прычыніцца да патрэбы залучэння замежных субкантрактных арганізацый на замежныя праекты, перадачы тэхнічнай і працоўнай дакументацыі на цепламантажныя работы і тэхналогій, гаворыцца ў даведцы-абгрунтаванні аб закупе ў адзінага прадаўца. Акрамя таго, у гэтай даведцы АСЭ адзначае павышаныя рызыкі банкруцтва «Сезама» і немагчымасць давання кампаніі дадатковага фінансавання ў межах генеральнага кантракту будаўніцтва Беларускай і Растоўскай АЭС.

Уладальнік холдынгу «Русское молоко» Васілій Бойка-Вялікі да прыходу ў аграбізнэс у 2002-2003 гадах працаваў у «Росатоме», займаў пасаду намесніка выканаўчага дырэктара інвестыцый «Росэнергоатома» (адказвае за расейскія АЭС). Ён таксама ўзначальваў раду дырэктараў генеральнага выканаўцы будаўніцтва трэцяга блока Калінінскай АЭС - «Севзапатомэнергостроя». У 2006 годзе Бойка-Вялікі ўдзельнічаў у стварэнні холдынгу «Энергоатоминжиниринг», які спецыялізуецца на будаўніцтве атамных і цеплавых электрастанцый ды іншых энэргетычных аб'ектаў.

Належны Бойку-Вялікаму контрагент «Росатома» стаў шырока вядомы пасля інцыдэнту на пляцоўцы будаўніцтва Беларускай АЭС, які адбыўся ўлетку мінулага года. Тады СМІ паведамілі, што «Сезам» выпусціў корпус рэактара для Беларускай АЭС пры яго пераладаванні. Мінэнэрга Беларусі папрасіла яго замяніць, і ўпалы корпус рэактара быў адпраўлены на прадпрыемства-вытворцу - завод «Атоммаш».

«Падобных да «Сезама» выканаўцаў у Расеі больш няма, - тлумачыць начальнік аналітычнага дэпартамента КК «БК-Сбережения» Сяргей Сувераў. - Гэтая кампанія - спадкаемка мантажнай управы, створанай у СССР для атамнай будоўлі, у тым ліку яна ўдзельнічала ў будаўніцтве Калінінскай АЭС».

Паводле ягоных слоў, колькасць незалежных контрагентаў «Росатома» скарачаецца.

Нагадаем, тэрміны здачы першага блока Беларускай АЭС ссунуліся з 2018 года на 2019-ы. Атамная станцыя ў Беларусі будуецца з парушэннем тэзісаў канвенцый Эспа і Орхуса. Беларусь не дала ніякіх грунтаваных на даследаваннях тлумачэнняў таго, чаму для будаўніцтва АЭС была абраная менавіта пляцоўка ў Астраўцы, які знаходзіцца за 50 км ад Вільні. Не праведзена ніводнага даследавання магчымага радыеактыўнага ўплыву на выпадак аварыі на міжнародныя воды, жыхароў Беларусі ды суседніх краін і навакольнае асяроддзе.