Расейскую «фабрыку троляў» западозрылі ў распальванні пратэстаў у ЗША

Расейскія “тролі” выкарыстоўвалі ў сваіх мэтах гульню Pokemon Go.

Тэлеканал СNN заявіў, што расейская "фабрыка троляў" спрабавала выкарыстаць папулярную мабільную гульню Pokemon Go з мэтай распальвання пратэстных настрояў сярод афраамерыканцаў. Расейскі бок назваў гэта бясталентным тлумачэннем узніклых у ЗША праблем, паведамляе bbc.com.

У матэрыяле тэлеканала ўдакладняецца, што гаворка ідзе пра кампанію ў абарону правоў афраамерыканцаў Do not Shoot Us ("Не страляйце ў нас"). СNN сцвярджае, што яна была запушчаная з Расеі праз сацсеткі і папулярную гульню Pokemon Go.

Кампанія накіраваная на прыцягненне ўвагі амерыканскай грамадскасці да выпадкаў паліцэйскага самавольства ў ЗША ў дачыненні да афраамерыканцаў. За яе стварэннем, сцвярджае СNN, стаяла расейскае "Агенцтва інтэрнэт-даследаванняў", вядомае таксама як "фабрыка троляў".

Паводле інфармацыі канала, усе звязаныя з кампаніяй Do not Shoot Us старонкі ў Facebook, Instagram і Twitter яна цяпер закрывае, аднак яе канал у сэрвісе YouTube па-ранейшаму існуе.

Праз гэты канал журналісты даведаліся пра абвешчаны ў 2016 годзе конкурс з гульнёй Pokemon Go. Удзельнікам конкурсу трэба было лавіць пакемонаў ў тых месцах, дзе паліцэйскія ўжылі зброю супраць чарнаскурых.

Афіцыйны прадстаўнік расейскага МЗС Марыя Захарава лаканічна пракаментавала сцвярджэнні журналістаў.

"Зыходзячы з логікі CNN, афраамерыканцы вызначаюцца са сваёй грамадзянскай пазіцыяй, гуляючы ў пакемонаў. Вось так бяздарна тэлеканал патлумачыў узнікненне расавых праблем у сучаснай Амерыцы", - напісала Захарава на сваёй старонцы ў "Фэйсбуку".

"Фабрыка троляў"

Пра Санкт-Пецярбургскую фірму "Інтэрнэт-даследаванняў", якую называюць "фабрыкай троляў", стала вядома ў 2015 годзе. Былая супрацоўніца агенцтва Людміла Саўчук падала на арганізацыю ў суд, заявіўшы, што працавала ў ёй "тролем", гэта значыць пісала за грошы каментары вызначанага зместу пад допісам у сацсетках.

У судзе Саўчук дамагалася афіцыйнага афармлення кантракту і вяртання завінавачанасці за заробак. У жніўні 2015 года суд прызнаў прычыненую Саўчук маральную шкоду і пастанавіў выплаціць ёй кампенсацыю, ацэненую пазоўніцай на 1 рубель.

Пакуль ішоў суд, былая супрацоўніца "фабрыкі" давала шмат інтэрв'ю, распавядаючы пра тое, як працуе арганізацыя.

"Калі "тролі" каментуюць нейкую навіну, яны ствараюць адчуванне, што людзі масава любяць Пуціна ці масава абураныя дзеяннямі Абамы або дзеяннямі Парашэнкі, напрыклад, - тлумачыла механізм працы арганізацыі Людміла. - І ствараюць бачнасць, што грамадская думка напраўду такая".

Спушчаны зверху афіцыёз транслююць ад асобы няісных хатніх гаспадынь, нефармалаў, бізнэсоўцаў, што стварае ілюзію агрэсіўнага, пляскае ў ладкі ўладам большасці. За такімі віртуальнымі персанажамі стаіць не так шмат людзей, але рэальныя людзі, якія такім чынам зарабляюць на жыццё.

За мінулыя два гады ў інтэрнэце з'явіўся шэраг фэйкавых матэрыялаў, распаўсюджванне якіх звязвалі з "фабрыкай", але сувязь заставалася недаказанай.

СМІ неаднаразова называлі ўладальнікам "Фабрыкі троляў" бізнэсоўца Яўгена Прыгожына. У ліку ягоных актываў - камбінат вытворчасці гатовага астуджанага харчавання "Канкорд", "Крама купцоў Елісеева" і Музей шакаладу. У 2009 годзе бізнэсовец адкрыў рэстарацыю ў доме ўрада Расеі.