У Грузіі парламент ухваліў новую Канстытуцыю
2- 13.10.2017, 19:02
- 13,767
Грузінскі парламент пераадолеў вета прэзідэнта.
Парламент Грузіі на пазачарговым пасяджэнні пераадолеў вета прэзідэнта і ўхваліў новую Канстытуцыю краіны. Папраўкі прэзідэнта Георгія Маргвелашвілі адхілілі, пасля чаго была прынятая першапачатковая рэдакцыя дакумента. У галасаванні не ўзялі ўдзелу прадстаўнікі апазіцыйных фракцый, яны вывесілі ў зале плакат «патаптаная нагамі Канстытуцыя», паведамляе svoboda.org.
Вета прэзідэнта парламент абмяркоўваў больш за 5 гадзін. За новую Канстытуцыю зноў прагаласавала кіруючая партыя «Грузінская мара». Яна кантралюе 117 мандатаў пры неабходным мінімуме 114 галасоў.
Новая Канстытуцыя забяспечвае пераход Грузіі на парламенцкае праўленне і істотна абмяжоўвае паўнамоцтвы прэзідэнта. Яна ўвойдзе ў дзеянне праз год, пасля прэзідэнцкіх выбараў. Раней прадстаўнікі апазіцыйных партый заявілі, што могуць арганізаваць масавыя акцыі пратэсту супраць новай рэдакцыі закона.