У аэрапорце Барыспаль затрыманы азербайджанскі апазіцыйны журналіст

Супрацоўніка тэлекампаніі «Туран ТБ» Фікрэта Гусейнлі затрымалі супрацоўнікі Дзяржпамежслужбы Украіны на запыт Баку.

Азербайджанскі апазіцыйны журналіст, супрацоўнік спадарожнікавага тэлеканала «Туран ТБ» Фікрэт Гусейнлі 14 кастрычніка быў затрыманы Дзяржаўнай памежнай службай Украіны па прыбыцці ў аэрапорт Барыспаль на падставе міжурадавага запыту з Азербайджана.

Ён паспеў напісаць у Facebook, што ўлады Азербайджана абвінавачваюць яго ў незаконным перасячэнні мяжы, паведамляе gordonua.com.

Як паведаміў кіраўнік расейскамоўнай рэдакцыі «Туран ТБ» Амін Ахмедбекаў, Гусейнлі, які прыбыў у Кіеў як прыватная асоба, знаходзіцца ў ізалятары аэрапорта «ў жудасных умовах».

З ягоных звестак, у запыце гаворка ідзе аб экстрадыцыі журналіста.

«Улічваючы, як быў збіты ў азербайджанскім СІЗА блогер, грамадзянін Ізраіля Лапшын (Аляксандр Лапшын, прысуджаны да трох гадоў пазбаўлення волі, спрабаваў скончыць жыццё самагубствам у ізалятары, пасля чаго быў памілаваны прэзідэнтам Ільхамам Аліевым. - заўв.), што 15 журналістаў і блогераў сёння знаходзяцца ў зняволенні ў Азербайджане, што ў гэтай краіне больш за 160 палітзняволеных, можна ўявіць, што чакае Гусейнлі, калі ўкраінскія ўлады яго выдадуць. Ён крытыкуе кіроўны рэжым як на тэлевізіі, так і ў Facebook», - сказаў Ахмедбекаў.

У 2006 годзе Гусейнлі, які супрацоўнічаў з апазіцыйным выданнем «Азадлыг», быў збіты ў Баку, пасля чаго пакінуў Азербайджан. У 2008 годзе яму далі палітычны прытулак у Нідэрландах, у 2015 годзе журналіст стаў грамадзянінам гэтай краіны.

Са слоў Ахмедбекава, аб затрыманні Гусейнлі найбліжэйшым часам будзе апавешчанае міністэрства замежных спраў Нідэрландаў. Міжнародная няўрадавая арганізацыя «Рэпарцёры без межаў» рыхтуе заяву ў сувязі з інцыдэнтам у Барыспалі, дадаў ён.