Дзяржаўныя СМІ называлі прапаршчыкаў з Печаў «марай камандзіра»

Газета Барысаўскага выканкама «вызначылася» артыкулам «Бацька салдатам».

У некаторых СМІ з'явілася інфармацыя аб тым, што ў коле падазраваных паводле справы Аляксандра Коржыча, які загінуў у Печах падчас праходжання тэрміновай вайсковай службы, знаходзіцца прапаршчык 3-й роты 3-й школы часткі №43064 Артур Вірбал, піша ex-press.by.

Гэтага прапаршчыка, які займаў пасаду старшыны роты, падазраюць у тым, што ён забраў у Коржыча банкаўскую картку і некаторы час здымаў з яе грошы ў банкаматах, расплачваўся ў кавярнях. У Следчым камітэце заяўляюць аб тым, што з карткі прапала як мінімум 180 рублёў.

У гэта цяжка паверыць, бо ў газеце Барысаўскага выканкама «Адзінства» Артур Леанідавіч Вірбал, які сам не так даўно адслужыў тэрміновую службу, названы проста «бацькам салдатаў». А камандзір падраздзялення, у якім служыць Артур Леанідавіч, маёр Аляксандр Чарноў, заявіў аўтару тэксту, падпалкоўніку запасу Мікалаю Макарэвічу: «Пра такога старшыну кожны камандзір падраздзялення марыць. <...> Падчас працы са сваімі падапечнымі гвардыі прапаршчык Артур Вірбал праяўляе сапраўды бацькоўскі клопат». Каментары да гэтай публікацыі чамусьці адключаныя.

Бацька жаўнерам

Ці датычны прапаршчык Вірбал да трагічнага здарэння ў Печах, павінны высветліць следчыя. І пра вынікі іх працы рана ці позна распавядуць афіцыйныя прадстаўнікі Следчага камітэта. Але ўжо сёння можна атрымаць уяўленне, пра што ці, дакладней, пра каго мараць камандзіры падраздзяленняў у Печах.