Леанід Заіка: «Шклоўскія» абулі жоўтыя боты і пабеглі

Улада ў Беларусі безнадзейна далёкая ад народа.

Пра гэта «БелГазеце» заявіў эканаміст, кіраўнік аналітычнага цэнтра «Стратэгія» Леанід Заіка:

- На першым этапе беларускага монакратычнага быцця адбывалася «шкловізацыя» улады, шкленне, бо «стекло» - па-беларуску гэта «шкло». Ва ўладу пацягнуліся вельмі многія з шклоўскіх месцаў - аграномы, дырэктары, следчыя. Грошай у іх тады не было. Тая ўлада была празрыстая і блізкая насельніцтву. З часам чыноўнікі сталі абуваць жоўтыя боты, як начальнікі крымінальнага вышуку мястэчка Севярынаўка Адэскага павета з выдатнай аповесці «Зялёны фургон», якія не маглі выстаяць перад магічнай сілай жоўтых ботаў і бралі іх у дар ад севярынаўцаў. Нашы чыноўнікі, надзеўшы боты, так спрытна пабеглі наперад, што народ стаў бачыць толькі іх спіны.

Таму Лукашэнка, убачыўшы, што чыноўнікі нічога не ведаюць і не разбіраюцца, пры гэтым яшчэ робяць фізіянамічныя хітрыкі, каб падабацца людзям, сказаў: вы аддаліліся ад народа, трэба быць бліжэй да яго. Чыноўнікі, ірвануўшы ў сваім дабрабыце, пабеглі наперад так хутка, што народ бачыць толькі іх спіны і азадкі. Аляксандр Рыгоравіч крочыць сямімільнымі крокамі наперадзе, за ім бягуць чыноўнікі - хто ўпрысядку, хто подскакам, а народ стаіць недзе там, далёка. Нюхае выхлапы «Майбаха», стоячы у баку.