Прэзідэнт Нямеччыны Штайнмаер сустрэнецца з Пуціным у Маскве
5- 16.10.2017, 14:59
- 11,926
Таксама Штайнмаер мае намер сустрэцца з прадстаўнікамі праваабарончай арганізацыі "Мемарыял" і Міхаілам Гарбачовым.
Візіт запланаваны на 25 кастрычніка, паведамілі ў канцылярыі прэзідэнта Нямеччыны. Штайнмаер таксама мае намер пагутарыць з прадстаўнікамі "Мемарыялу" і Міхаілам Гарбачовым.
Прэзідэнт ФРГ Франк-Вальтэр Штайнмаер (Frank-Walther Steinmeier) 25 кастрычніка прыбудзе ў Маскву, дзе сустрэнецца з прэзідэнтам Расеі Уладзімірам Пуціным. Пра гэта ў панядзелак, 16 кастрычніка, паведаміла канцылярыя кіраўніка дзяржавы. Падчас візіту Штайнмаер наведае ў Маскве Петрапаўлаўскі сабор, будынак якога расейская дзяржава мае намер вярнуць Евангельска-лютэранскай царкве ў Расеі ў сувязі са святкаваннем 500-годдзя Рэфармацыі, паведамляе "Нямецкая хваля".
Будучы міністрам замежных спраў Нямеччыны, Штайнмаер супольна з Евангелічнай царквой Нямеччыны дамагаўся перадачы будынка лютэранам. У Маскве прэзідэнта будзе суправаджаць кіраўнік евангелічнай царквы біскуп Хайнрых Бедфорд-Штром (Heinrich Bedford-Strohm).
Акрамя таго, Штайнмаер мае намер сустрэцца з прадстаўнікамі праваабарончай арганізацыі "Мемарыял" і былым прэзідэнтам СССР Міхаілам Гарбачовым.
Апошнім разам прэзідэнт ФРГ наведваў Расею ў 2010 годзе, тады гэту пасаду займаў Крысціян Вульф (Christain Wulff). Ягоны пераемнік Ёахім Гаўк (Joachim Gauck) не ездзіў у Маскву.