Украіну абралі ў Раду ААН правоў чалавека
- 16.10.2017, 21:50
- 8,611
177 галасамі Украіна выбрана ў склад Рады ААН у правах чалавека на 2018-2020 гады.
Украіну абралі ў Раду ААН у правах чалавека на перыяд 2018-2020 падчас галасавання Генеральнай Асамблеі ААН, паведаміў у твітары намеснік міністра замежных спраў Украіны Сяргей Кісліца, паведамляе «Новая газета».
«Яшчэ адна пляцоўка, на якой Украіна будзе бараніць правы чалавека ў свеце і, між іншым, на акупаваных тэрыторыях Данбаса і Крыма», - напісаў ён.
Украіна уваходзіла ў РПЧ ААН з 2006 да 2011 года.
У панядзелак, 16 кастрычніка, прайшлі выбары 15 сябраў РПЧ ААН, якія заменяць краіны, што пакідаюць Раду 31 снежня 2017 года. У склад Рады правоў чалавека ААН уваходзяць 47 краін, якія абіраюцца ад рэгіянальных груп на тры гады з магчымасцю пераабрання на другі тэрмін.
У кастрычніку мінулага года Расея не набрала неабходнай колькасці галасоў для перавыбрання ў Раду і выбыла з яе.