Еўракамісар Хан: У пэўным сэнсе «План Маршала для Украіны» ўжо дзейнічае

ЕЗ даў Украіне беспрэцэдэнтнае фінансаванне, цяпер неабходна забяспечыць аптымальнае выкарыстанне грантаў і крэдытаў.

Пра гэта ў інтэрв'ю парталу Eastbook сказаў еўракамісар у пытаннях пашырэння і палітыкі суседства Ёханэс Хан.

«Мы абавязаліся даць €12,8 млрд макрафінансавай падтрымкі на правядзенне палітычных і эканамічных рэформаў. Гэта разнастайныя крэдыты і гранты, не кажучы ўжо пра вялікія аб'ёмы фінансавання, прапанаваныя Украіне іншымі донарамі і міжнароднымі арганізацыямі. У пэўным сэнсе «План Маршала для Украіны» ўжо дзейнічае. у немалой ступені дзякуючы намаганням міжнародных партнёраў, у тым ліку ЕЗ, украінская эканоміка ў значнай ступені стабілізавалася», - заявіў Хан.

«Галоўная задача заключаецца не столькі ў павелічэнні фінансавання, колькі ў тым, каб забяспечыць аптымальнае выкарыстанне грантаў і крэдытаў», - дадаў ён.

Паводле ягоных перакананняў, украінскія ўлады павінны засяродзіць намаганні на паляпшэнні бізнэс-клімату, судовай сістэмы і барацьбе з карупцыяй.

«Ёсць усе падставы меркаваць, што Украіна з яе патэнцыйна велізарным рынкам стане прывабнай для інвестараў, як толькі тыя будуць упэўненыя, што іх ўласнасць і кантракты ў бяспецы. Са свайго боку, украінскія ўлады павінны быць у стане абараніць рынак ад рэйдэрства і крадзяжу. Замест таго, каб шукаць новыя крыніцы атрымання грамадскіх сродкаў (якія, дарэчы, не заўсёды лёгка асвоіць), прыярытэтам павінна стаць прыцягненне ўнутраных і замежных прыватных інвестыцый, якія дапамогуць паскорыць эканамічны рост, стварыць працоўныя месцы», - адзначыў еўракамісар.

У канцы сакавіка Еўрапейская народная партыя на з'ездзе, які праходзіў на Мальце, прыняла рэзалюцыю аб распрацоўцы доўгатэрміновага плана дапамогі Украіне («Плана Маршала для Украіны»). У рэзалюцыі ЕНП заклікала дзяржавы - сябры ЕЗ «з дапамогай двухбаковых і шматбаковых праграм аказваць Украіне вайсковую, гуманітарную і эканамічную дапамогу». Таксама партыя прапанавала стварыць «шырокі інвестыцыйны пакет», накіраваны на паскоранае аднаўленне эканомікі Украіны.

Адзін з аўтараў дакумента, экс-прэм'ер-міністр Літвы і цяперашні дэпутат Сейма Андрус Кубілюс заявіў, што «План Маршала для Украіны» будзе прэзентаваны на саміце «Усходняга партнёрства» ў лістападзе. З ягоных слоў, дакумент пазітыўна ацанілі ў Дзяржаўным дэпартаменце і Кангрэсе ЗША. Кубілюс мяркуе, што рэалізацыя доўгатэрміновага «плана Маршала» дазволіць «уліць у рэальную эканоміку Украіны да €5 млрд у год».

У ліпені прэзідэнт Украіны Пятро Парашэнка заявіў, што Украіна і лідары Еўразвязу абмеркавалі магчымасць правядзення у 2018 годзе інвестыцыйнай канферэнцыі па «Плану Маршала для Украіны». 25 жніўня 2017 года ўкраінска-літоўскі праект дапамогі Украіне быў прэзентаваны ў еўрапейскіх інстытуцыях.

План Маршала - праграма дапамогі Еўропы пасля Другой сусветнай вайны. Быў распрацаваны ў 1947 годзе амерыканскім дзяржаўным сакратаром Джорджам К. Маршалам і ўвайшоў у дзеянне ў красавіку 1948 года. Заяўленай ЗША мэтай рэалізацыі плана было аднаўленне разбуранай вайной эканомікі Еўропы, ліквідацыя гандлёвых бар'ераў, мадэрнізацыя прамысловасці. У праграме ўдзельнічалі 17 еўрапейскіх краін.