Як беларусы абараняюць Бараўлянскі лес

Больш за пяць тысяч жыхароў пасёлка Бараўляны паўсталі супраць чыноўнікаў.

На пачатку восені мы расказвалі пра жыхароў пасёлка Бараўляны пад Менскам, якія змагаюцца супраць знішчэння лесу. Яны прапануюць пабудаваць школу і садок на найбліжэйшым поле і захаваць такім чынам зялёны масіў, паведамляе «Белсат».

Пад патрабаваннем пакінуць у спакоі лес у Бараўлянах жыхары назбіралі ўжо больш за пяць тысяч подпісаў. Цяпер яны даведаліся, што ў пасёлку праходзіць іншы збор подпісаў.

Са слоў мясцовых жыхароў, чыноўнікі пачалі выкарыстоўваць адміністрацыйны рэсурс, далучаючы да збору подпісаў настаўнікаў і лекараў. А каб паказаць, што кампраміс у развязанні праблемы ўжо знайшлі, мясцовыя чыноўнікі ідуць і на іншыя хітрыкі - запрашаюць асвятляць пытанне дзяржаўныя СМІ.