Лукашэнка: Гара ўжо з космасу бачная

Дыктатар пераключыўся на сметнішчы.

Лукашэнка заявіў пра неабходнасць распрацоўкі доўгатэрміновай праграмы для рэкультывацыі і закрыцця палігонаў, а таксама ўкаранення новых падыходаў да абыходжання з адкідамі.

Аб гэтым правадыр выказаўся на рэспубліканскім семінары аб удасканаленні і развіцці ЖКГ, піша БелТА.

"Найбольш востра гэтая праблема стаіць для нашай сталіцы. На палігоне «Паўночны» за перыяд яго эксплуатацыі з 1981 года пахавана 25 млн т адкідаў, што больш як у 7 разоў перасягае праектныя нагрузкі. І гара адкідаў ужо бачная пры пад'ездзе да горада за некалькі дзясяткаў кіламетраў і з космасу вельмі добра бачная, - адзначыў Лукашэнка. – Такая сітуацыя патрабуе распрацоўкі доўгатэрміновай праграмы рэкультывацыі і закрыцця палігонаў, а таксама ўкаранення новых падыходаў да абыходжання з адкідамі. У нас не так шмат свабоднай зямлі, каб будаваць палігоны і складаваць на іх смецце. Тым больш вам паказалі самыя сучасныя ўзоры і падыходы да гэтай справы. Рэнтабельныя для тых, хто гэтага хоча. Навука павінна далучыцца і сказаць, што найбольш мэтазгодна: спальваць смецце і атрымліваць ад гэтага энергію або большую яго частку перапрацоўваць».

Паводле слоў Аляксандра Лукашэнкі, штогод у краіне утвараецца 4 млн т цвёрдых камунальных адкідаў. З іх паводле вынікаў 2016 года накіравана на пахаванне 84%, а на перапрацоўку - толькі 16%.

«Так, быццам на фоне суседзяў мы выглядаем цалкам годна: апярэдзілі ўсе краіны СНД, Латвію, Славакію, зраўняліся з Гішпаніяй, Партугаліяй, Фінляндыяй. Але праблема гэтая сур'ёзная. Для пахавання ўсяго аб'ёму камунальных адкідаў у краіне выкарыстоўваецца 168 палігонаў і 1,5 тысячы міні-палігонаў у сельскай мясцовасці. Больш за 90% з іх пабудаваныя ў часы СССР. Магутнасці гэтых палігонаў цяпер практычна вычарпаныя, а эксплуатацыя не гарантуе бяспечнага ўтрымання адкідаў», - сказаў правадыр.

«Мы ведаем, што гэта за палігоны і міні-палігоны. Лётаючы над краінай, я гэта вельмі добра бачу. Новаму міністру прыродных рэсурсаў пастаўлена жалезная задача разабрацца з тымі, хто адказвае за гэтыя палігоны, і асабліва з тымі, хто гэтыя палігоны стварае абы-дзе. Гэта значыць засмечваюць лясы, дарогі, прыдарожныя палосы і г.д. Вы ведаеце, пра што ідзе гаворка. Дзейнічайце», - дадаў Лукашэнка.