Украіна заклікала ААН супрацьстаяць пуцінскай прапагандзе
1- 21.10.2017, 10:03
- 10,566
Міжнародная супольнасць павінна падвоіць намаганні ў рэагаванні на гэтую глабальную пагрозу.
Міжнародная супольнасць павінна ўмяшацца ў распаўсюд расейскай прапаганды і скажэнне фактаў Крамлём, заявіў на пасяджэнні Чацвёртага камітэта Генеральнай асамблеі Арганізацыі Аб'яднаных Нацый першы сакратар пастаяннага прадстаўніцтва Украіны пры ААН Алег Ніколенка, паведамляе «Укринформ».
З ягоных слоў, расейская прапаганда з выкарыстаннем дзяржаўных медыя, а таксама сістэматычныя фальсіфікацыі фактаў Крамлём распалілі нянавісць расейцаў да Украіны. Ён падкрэсліў, што з дапамогай прапаганды канфлікт пагаршаецца, і гэта патрабуе рэакцыі міжнароднай супольнасці.
«Мы глыбока занепакоеныя маштабнай кампаніяй прапаганды і падбухторваннем нянавісці да Украіны і ўкраінцаў, што ажыццяўляецца расейскімі дзяржаўнымі СМІ і грамадскімі дзеячамі. Гэта адыграла важную ролю ў распальванні агрэсіі Расеі супраць Украіны і канфлікту на Данбасе», - сказаў Ніколенка.
Ён падкрэсліў, што расейскія ўлады абмежавалі незалежныя СМІ і ўзмацнілі кантроль над дзяржаўнымі медыя, ператварыўшы іх у магутныя інструменты дзяржаўнай прапаганды, якія робяць фальшывыя навіны.
«Такая гібрыдная вайна супраць Украіны з прыцягненнем падкантрольных дзяржаве расейскіх СМІ з'яўляецца прамой пагрозай для каштоўнасцяў ААН. Камітэт і іншыя органы ААН павінны аператыўна рэагаваць на такія спробы фальсіфікацыі навін і выкарыстання іх у якасці інструмента паглыблення рэгіянальных канфліктаў», - заявіў украінскі дыпламат.
Ён заклікаў міжнародную супольнасць падвоіць намаганні ў рэагаванні на гэтую глабальную пагрозу.
«Мы перакананыя, што інфармацыйная бяспека з'яўляецца ключавым элементам у кожнай сістэме нацыянальнай бяспекі, і ААН павінна стаць маяком для гэтага шляху выяўлення і прыцягнення да адказнасці тых, хто ўдзельнічае ў прапагандысцкіх войнах», - дадаў Ніколенка.