У інтэрнэт выклалі невядомую песню Уладзіміра Мулявіна
1- 23.10.2017, 16:58
- 21,385
Запіс з'явіўся на youtube-канале «Песняры часу свайго» ўкраінска-шатландскай даследчыцы фольк-музыкі.
- Гэта матэрыял з майго асабістага архіва, - распавядае kp.by ўкраінска-шатландская даследчыца фольк-музыкі Анжэла Гергель. - Песню зафіксавалі на рэпетыцыі ансамбля як раз тады, калі рыхтавалася да здачы праграма «Вянок». Плёнка мне дасталася ў свой час ад аднаго з музыкаў ансамбля.
Жартоўная рэч «Па ляду, у глухім бары» павінна была ўвайсці ў праграму «Песняроў» на вершы Максіма Багдановіча «Вянок» нароўні са «Слуцкімі ткачыхамі», «Веранікай» і «Зоркай Венерай». Але Уладзімір Мулявін чамусьці наважыў выключыць нумар з цыклу.
- Цікава, што ўступленне да «Па ляду, у глухім бары» засталося ў праграме - яно перавандравала да песні «Вянок», - заўважае Анжэла.
Дарэчы, сёлета праграму «Вянок» аднавіў Нацыянальны акадэмічны народны аркестр імя Іосіфа Жыновіча з удзелам музыкаў з постпесняроўскіх праектаў. Новыя аранжыроўкі дырыжор Аляксандр Крамко напісаў, мабыць, з іншай копіі запісу з той жа рэпетыцыі 1991 года. Яна трапіла ў калектыў праз маскоўскіх прыхільнікаў ансамбля.
Першы паказ «Вянка» з аркестрам адбыўся 9 верасня каля Ратушы, а наступны плануецца на 9 снежня - у дзень нараджэння Максіма Багдановіча. На гэтых канцэртах «Па ляду, у глухім бары» таксама гучыць сярод іншых нумароў цыклу.