Дзедаўшчына ў войску: рэкамендацыі сваякам жаўнераў
3- 23.10.2017, 20:20
- 22,321
Калі жаўнер сутыкаецца з гэтай праблемай, яе не трэба замоўчваць.
Дзедаўшчына – гэта злачынствы ў войску. І калі жаўнер сутыкаецца з гэтай праблемай, яе не трэба замоўчваць. Трэба дзейнічаць рашуча і хутка, мяркуюць праваабаронцы. Сваякі жаўнераў павінны разумець: калі яны не паведамяць пра гэтыя злачынствы дзяржаўным органам і грамадскасці, то гэтага не зробіць ніхто, піша «Вясна».
I. Што такое дзедаўшчына?
Дзедаўшчына – пазастатутныя адносіны, якія выходзяць за межы службовых паўнамоцтваў. Праяўляецца ў тым, што жаўнеры, якія праслужылі большы тэрмін службы, сяржанты, прапаршчыкі выкарыстоўваюць розныя формы псіхалагічнага і фізічнага гвалту ў дачыненні да жаўнераў тэрміновай службы.
З пункту гледжання правоў чалавека:
гэта жорсткае і бесчалавечнае абыходжанне, катаванні - яны недапушчальныя ні пры якіх абставінах.
У беларускім заканадаўстве:
такія дзеянні як збіццё, фізічныя і псіхалагічныя здзекі, вымаганне грошай і ды іншае, крыміналізаваныя – з’яўляюцца злачынствам і караюцца. Іх не трэба замоўчваць - трэба дзейнічаць рашуча.
ІІ. Якім чынам заявіць пра дзедаўшчыну?
Вырашаць праблему з кіраўніцтвам вайсковай часткі – неэфектыўна.
Бо ніхто не зацікаўлены “выносіць смецце з хаты”.
Эфектыўней запісацца на прыём да міністра абароны, выкласці яму праблему і патрабаваць перавесці жаўнера ў іншую вайсковую частку. Таксама варта накіраваць у Міністэрства абароны пісьмовы зварот, каб была праведзеная ўнутраная праверка.
Надзейней звяртацца ў дзяржаўныя органы, якія па-за вайсковай сістэмай – Следчы камітэт, пракуратуру, міліцыю.
Трэба падаць заяву пра ўчыненне злачынства ў аддзяленні пералічаных органаў – па месцы знаходжання вайсковай часткі альбо па месцы жыхарства заяўніка. Не атрымліваецца падаць заяву асабіста – можна даслаць яе поштай.
Праваахоўны орган, куды накіраваная заява, павінен:
разгледзець заяву альбо перанакіраваць яе ў той орган, які абавязаны яе разгледзець;
правесці праверку;
пры ўстанаўленні складу злачынства прыняць пастанову пра распачынанне крымінальнай справы.
III. Куды звяртацца па дапамогу?
Праваабарончыя арганізацыі, якія працуюць у Менску і рэгіёнах, дадуць юрыдычную кансультацыю ці парады, дапамогуць скласці звароты ў адпаведныя праваахоўныя органы. Таксама дапамогуць у распаўсюдзе інфармацыі, каб надаць справе грамадскі рэзананс.
Медыя шырока распавядуць пра сітуацыю беззаконня, звернуцца па каментары да службовых асобаў, будуць сачыць за развіццём справы і падтрымліваць інфармацыйна.