Архітэктар беларускай царквы ў Лондане вылучаны на сусветную прэмію
6- 4.10.2017, 21:59
- 24,056
Царква Святога Кірылы Тураўскага - першы драўляны храм Лондана ад 1666 года.
Архітэктар беларускай царквы ў Лондане Со Цзывай вылучаны на самую прэстыжную сусветную ўзнагароду ў галіне архітэктуры сярод маладых архітэктараў. На прэмію прэтэндуюць яшчэ 14 архітэктараў з усяго свету. Вынік будзе абвешчаны ў лістападзе на Сусветным фестывалі архітэктуры ў Бэрліне.
«Гэта велізарны гонар, гэта найвышэйшая ўзнагарода ў свеце для архітэктараў да 45-ці гадоў. Я буду спаборнічаць з 14-ю найлепшымі архітэктарамі свету. Я спадзяюся, што гісторыя пра Беларусь зробіць ўражанне на журы», - распавёў «Свабодзе» Со Цзывай.
Архітэктар драўлянай уніяцкай беларускага царквы ў Лондане Со Цзывай ужо атрымаў за свой праект узнагароду Каралеўскага інстытута брытанскіх архітэктараў, беларуская царква трапіла ў лік найлепшых будынкаў Лондана за 2016 год, а таксама перамагла ў намінацыі «Народны выбар» у архітэктурным конкурсе New London Architecture.
Царкву Святога Кірылы Тураўскага пабудавалі каля Беларускай каталіцкай місіі ў Лондане ў 2016 годзе. Яна стала першым драўляным храмам Лондана ад 1666 года. Дзеля «адчування беларускай архітэктуры» Со Цзывай спецыяльна прыязджаў у Беларусь, каб убачыць аўтэнтычныя драўляныя цэрквы.
Царква таксама з'яўляецца храмам-помнікам ахвярам трагедыі на Чарнобыльскай АЭС.
Прэмія для маладых архітэктараў часопіса Architectural Review «AR Emerging Architecture Awards» уручаецца 19-ы год запар. Яна дае маладым архітэктарам магчымасць прадэманстраваць свой талент і атрымаць прызнанне ў свеце.