«Дармаедаў» зімой пачнуць высяляць на вуліцу?

Свістапляска з дэкрэтам №3 скончыцца для Лукашэнкі рэвалюцыяй.

Спецыялісты прааналізавалі меры, якія могуць быць прынятыя супраць «дармаедаў» паводле абноўленага дэкрэтам №3. Самым уражлівым аказаўся «асобны» тарыф на паслугі ЖКГ: у зімовы час за абаграванне беспрацоўныя будуць плаціць у пяць разоў больш.

Да чаго прывядзе такая «камунальная сегрэгацыя» ў беларускім грамадстве? На гэта і іншыя пытанні ў інтэрв'ю Charter97.org адказаў прадстаўнік Беларускага Нацыянальнага Кангрэсу Алесь Яўсеенка.

- Абноўлены дэкрэт №3 падымае для «дармаедаў» плату за зімовае ацяпленне ў пяць разоў. Як вы ацэньваеце такі «падарунак» ад уладаў напярэдадні наступу халадоў?

- Сітуацыя, якая склалася ў нас у Беларусі, ідзе ў разрэз з усякай логікай і чалавечай мараллю. Замест таго, каб дапамагчы людзям, пастаўленым бясталентным кіраўніцтвам у цяжкае становішча, улады зноў «дзяруць тры шкуры».

Даражэе не толькі камуналка - для «дармаедаў» збіраюцца зрабіць платнымі і медыцынскія паслугі. І мы не ведаем, якія яшчэ «падводныя камяні» схаваныя ў абноўленым дэкрэце №3.

Я ўпэўнены: уся гэтая свістапляска скончыцца для Лукашэнкі сацыяльным выбухам і рэвалюцыяй.

Гэты сацыяльны выбух рыхтуе сваімі рукамі сам беларускі рэжым. Улады парушылі Канстытуцыю: права на працу гарантавана асноўным законам. Але замест забеспячэння грамадзян магчымасцю працаваць іх пераводзяць у «падданае саслоўе» і прыдумляюць новыя і новыя паборы і асобныя тарыфы.

Зноў жа, па Канстытуцыі ўсе роўныя перад законам. А на практыцы мы бачым, што «ёсць роўныя, а ёсць - раўнейшыя». Да чыноўнікаў і насельнікаў Драздоў дзяржава ставіцца інакш, чым да простых грамадзян. Для іх адкрыты вялізныя магчымасці, каб разбагацець і прымножыць сваё багацце. А для астатніх ёсць толькі права плаціць у казну.

І ўсё гэта гадамі збіраецца, адзін пласт народнай нянавісці накладваецца на іншы. Уся гэта незадаволенасць сегрэгацыяй і няроўнасцю ў Беларусі фармуецца ў такі велізарны снежны ком, што я не пазайздрошчу таму, хто апынецца на яго шляху. Сацыяльны выбух проста наканаваны нашай уладзе. Яны хутка пажнуць наступствы сваёй «мудрай» палітыкі.

Ці будуць людзі і далей цярпець гэтае беззаконне? Скажу дакладна: не.

- Як далёка могуць зайсці ўлады ў выкананні скандальнага дэкрэта №3? Бо заплаціць за ацяпленне ў пяцікратнай суме для беспрацоўнага - проста нонсэнс.

- Ведаеце, нават за савецкім часам была норма, якая забараняла высяляць у зімовы час на вуліцу тых грамадзян, якія не могуць ці не хочуць своечасова аплаціць камунальныя паслугі.

А ў лукашэнкаўскай Беларусі гэта можа стаць практыкай. Таму што ў нас, як кажуць у народзе - «ля стырна скнары стаяць». «Касманаўт» Лукашэнка і ягоныя людзі безнадзейна далёкія ад народа.

Таму я не здзіўлюся, калі «дармаедаў» пачнуць высяляць зімой на вуліцу ці адключаць ім ацяпленне ў самы разгар маразоў. Магчымасць гэтага - вельмі высокая.

Хтосьці напэўна падумае, што выратаванне ў тым, каб пераязджаць у вёску ці на лецішчы і там зімаваць. Але хачу нагадаць, што камуналка для тых, хто не прапісаны ў сельскай мясцовасці і пражывае там, у два-тры разы вышэйшая, чым для вяскоўцаў. Гэтыя «драконаўскія» паборы ўжо апрабавалі на розных групах насельніцтва. Бегчы няма куды - вакол «чырвоныя сцяжкі». Значна разумней згуртавацца і змагацца за свае правы і годнае жыццё.

- Вы сказалі, што дзяржава па-рознаму ставіцца да чыноўнікаў і простых грамадзян. Ці падвысяць камунальныя тарыфы для ўладальнікаў раскошных асабнякоў у Драздах?

- Думаю, яны будуць плаціць паводле звычайнага тарыфу без усялякіх яго павелічэнняў. Пра што можна казаць, калі ў нас нават няма звычайнага для развітых краін падатку на раскошу?

Як бы наадварот не выйшла, што простыя людзі будуць аплачваць частку выдаткаў на камунальнае абслугоўванне гэтых асабнякоў. Бо для нас ўводзяць 100% аплату паслуг ЖКГ, а для іх - наўрад ці ўвядуць. Хутчэй Лукашэнка будзе яшчэ больш закормліваць сваю «прыдворную раць», каб з'яднаць яе каля сябе перад небяспекай народнага выбуху. Рука руку мые.

- Падатак на «дармаедаў» стаў каталізатарам пратэстаў вясной гэтага года. Ці прывядзе да такога ж эфекту і абноўленая версія дэкрэта №3?

- Самае галоўнае - гэта тое, што Лукашэнка ў вачах народа перастаў быць часткай «сацыяльнага кантракту». Ён ужо проста не выконвае сваёй функцыі. Усе яго апавяданні пра «сацыяльную стабільнасць», параўнанні з пачаткам 1990-х даўно ўжо страцілі сэнс.

Сацыяльны выбух, які адбудзецца ў Беларусі, будзе «рэвалюцыяй на галодны страўнік». Любому чалавеку свая кашуля бліжэй да цела, а цяпер гэтая кашуля трашчыць па швах. У беларусаў не засталося іншага выйсця, акрамя выратавання сябе шляхам аб'яднання і сумесных дзеянняў супраць тых, хто пазбавіў іх усялякіх сацыяльных магчымасцяў.

Гэта і стане платформай для аб'яднання ўсіх незадаволеных рэжымам, а такіх людзей становіцца з кожным днём усё больш і больш.