Расейскага святара-сутэнёра прысудзілі да 5,5 гадоў турмы

Святар Мікалай Кірэеў сваю віну не прызнаў.

Суд Чыгуначнага раёна Віцебска 14 лістапада абвясціў прысуд паводле крымінальнай справы «бацюшкі-сутэнёра» - 39-гадовага святара Мікалая Кірэева з Ленінградскай вобласці, якога затрымалі ў кампаніі жанчын лёгкіх паводзін на вакзале ў беларускім горадзе. Яму прызначылі пакаранне ў выглядзе 5 гадоў 6 месяцаў пазбаўлення волі ў калоніі ўзмоцненага рэжыму з канфіскацыяй маёмасці, паведамляе tut.by.

Сваю віну ў злачынствах святар Мікалай Кірэеў не прызнаў.

Слуханні пад старшынствам суддзі Дзяніса Аляксеенка працягваліся тры тыдні ў закрытым рэжыме. Журналістаў у залу не пусцілі нават перад пачаткам працэсу 25 кастрычніка, спаслаўшыся на «просьбу пацярпелых».

Расейца вінавацілі ў замаху на арганізацыю і выкарыстанне заняткаў прастытуцыяй іншымі асобамі, спалучаныя з вывазам за межы дзяржавы асоб для прастытуцыі - пры гэтым злачынства не было даведзеная да канца з незалежных ад гэтай асобы абставін.

Працэс быў закрытым, бо справа тычылася злачынстваў у палавой сферы - «у мэтах прадухілення выдавання звестак аб інтымных баках жыцця асоб, якія ўдзельнічаюць у справе, што зневажае іх годнасць». Для бяспекі пацярпелых, са слоў суддзі, ім змянілі анкетныя звесткі

Нагадаем, айца Мікалая (Мікалая Кірэева) затрымалі 3 жніўня. Першапачаткова паведамлялася, што гэта адбылося падчас штурму прытона ў Віцебску, аднак пазней Следчы камітэт удакладніў: кайданкі на 39-гадовага мужчыну надзелі на аўтавакзале Віцебска, калі бацюшка спрабаваў сесці ў аўтобус разам з 20-гадовай і 30-гадовай жанчынамі.

Паводле звестак следства, мужчына з красавіка да жніўня 2017 года перапісваўся ў інтэрнэце з гэтымі жанчынамі. Атрымаўшы іх згоду на занятак прастытуцыяй за грошы ў Санкт-Пецярбургу, 3 жнiўня абвінавачаны прыехаў у Віцебск, каб даставіць іх у Расею. А 19.30 яго затрымалі супрацоўнікі міліцыі пры пасадцы ў аўтобус Віцебск - Санкт-Пецярбург побач з домам №2 на вуліцы Касманаўтаў у абласным цэнтры.

Следчыя таксама ўсталявалі, што мужчына, у змове з 19-гадовай грамадзянкай Таджыкістана і іншымі асобамі, у студзені-лютым гэтага года вёў аналагічную перапіску ў інтэрнэце з іншымі беларускамі. Дзве з іх - 25-гадовая і 29-гадовая жанчыны - адказалі згодай займацца прастытуцыяй у Санкт-Пецярбургу за грошы.

На загад расейца грамадзянка Таджыкістана ў лютым прыбыла ў Гомель і правяла вербавальныя гутаркі з жанчынамі. Дамовіўшыся з імі пра вываз для занятку прастытуцыяй, купіла квіткі на цягнік Гомель - Санкт-Пецярбург. Аднак яе затрымалі праваахоўнікі пры пасадцы ў цягнік на чыгуначным вакзале Гомеля.

Суд Чыгуначнага раёна Гомеля прысудзіў вярбоўшчыцу да 5 гадоў пазбаўлення волі з канфіскацыяй маёмасці. У калоніі жанчына ўбачыла тэлесюжэт аб затрыманні ў жніўні ў Віцебску мужчыны, які спрабаваў вывезці дзяўчат у Санкт-Пецярбург для занятку прастытуцыяй. У затрыманым яна апазнала чалавека, які адправіў яе ў Гомель з мэтай прывезці двух дзяўчат у расейскую паўночную сталіцу.