Мама зніклага ў Белавежскай пушчы хлопчыка: Надзея ёсць
3- 14.11.2017, 16:33
- 46,023
Прайшло амаль два месяцы з моманту знікнення ў Белавежскай пушчы 11-гадовага Максіма Мархалюка.
Пошукавая аперацыя разгарнулася яшчэ ў верасні і не спынялася ні на адзін дзень. Але навінаў пра самога Максіме па-ранейшаму няма, піша kp.by.
- Хлопчыка прадаўжаюць шукаць у лесе. Ад масавых пошукаў з прыцягненнем валанцёраў мы адмовіліся - цяпер у гэтай аперацыі занятыя найбольш падрыхтаваныя супрацоўнікі міліцыі. Яны адпрацоўваюць кропкавыя месцы, дзе, магчыма, мог бы знаходзіцца хлопчык, - распавялі ў прэс-службе УУС Гарадзенскага аблвыканкама.
Мама хлопчыка спадзяецца, што Максім дасць аб сабе ведаць.
- Я тэлефаную ў міліцыю, але мне кажуць, што нічога няма - ніякіх слядоў, зачэпак, - цяжка ўздыхае Валянціна. - Пошукі прадаўжаюцца. Калі б мы ведалі, куды ісці...
- У вас ёсць надзея?
- Вядома, бо яго яшчэ не знайшлі.
- Можа быць, сябры Максіма нешта казалі?
- Не, мы пыталі. Ніхто нічога не ведае.
- Вас падтрымліваюць аднавяскоўцы?
- Усе маўчаць. Што там падтрымліваць... Не ведаем мы, не ведаюць яны. Спадзяемся да апошняга.
Праз 10 дзён пасля знікнення хлопчыка была распачатая крымінальная справа. Следчыя прадаўжаюць адпрацоўваць розныя версіі.
- Праца вядзецца ў тым ключы, у якім яна пачыналася. Калі б з'явіліся нейкія навіны, мы б самі абавязкова зрабілі заяву, - распавёў афіцыйны прадстаўнік УСК Гарадзенскай вобласці Сяргей Шаршаневіч.
Актывісты пошукава-выратавальнага атрада «Анёл» пакінулі пушчу, але каардынатары адзначаюць, што гатовыя прыйсці на дапамогу ў кожны момант.
Нагадаем, 11-гадовы Максім Мархалюк з вёскі Новы Двор Свіслацкага раёна Гарадзенскай вобласці знік 16 верасня: пайшоў у лес па грыбы і не вярнуўся. Дзіця пачалі шукаць у той жа вечар: спачатку гэта былі толькі родныя і суседзі, затым да пошукаў падключылася міліцыя. У пошуках бралі ўдзел блізу 2 тысяч чалавек: валанцёры, выратавальнікі, міліцыя, леснікі і мясцовыя жыхары. Мясцовасць аглядалі з верталётаў, уначы правяралі цеплавізар. На жаль, пакуль пошукі не далі выніку.
Максім абвешчаны ў міжнародны вышук. З пачатку кастрычніка фатаграфія і анкета хлопчыка знаходзяцца на сайце Інтэрпола. Калі дзіця знойдуць за межамі Беларусі - інфармацыю пра гэта адразу перададуць беларускім праваахоўнікам.