Мугабэ пагадзіўся адрачыся ад улады

Дыктатара ўтрымліваюць вайскоўцы, ягоная прэс-канферэнцыя адбудзецца заўтра.

Кіраўнік Зімбабвэ Роберт Мугабэ правёў перамовы з вайскоўцамі, падчас якіх ён папрасіў даць ягонай жонцы Грэйс Мугабэ магчымасць пакінуць краіну, паведамляе Афрыканскае агенцтва навінаў (ANA) са спасылкай на крыніцу ў сферы бяспекі краіны (пераклад - interfax.ru).

У абмен на гэта Мугабэ гатовы адмовіцца ад улады, адзначыла крыніца. Магчымай краінай для ўцёкаў жонкі прэзідэнта агенцтва называе ПАР.

«Мугабэ дамовіўся аб магчымасці пакінуць краіну для Грэйс, ён сам рыхтуецца пакінуць сваю пасаду. Прэс-канферэнцыя адбудзецца заўтра а другой палове дня. Вайскоўцы насамрэч трымаюць прэзідэнта і ягоную ахову ў няволі», - заявіла крыніца.

Між тым, паводле звестак крыніц брытанскага тэлеканала Sky News, Грэйс Мугабэ пакінула Зімбабвэ і збегла ў Намібію.

У сталіцу Зімбабвэ Харарэ з ПАР вярнуўся адхілены Мугабэ віцэ-прэзідэнт краіны Эмерсан Мнангагва. Ён збег з Зімбабвэ пасля таго, як стаў атрымліваць пагрозы. Цяпер ён мае намер паспрабаваць атрымаць кантроль над урадам краіны.

Таксама агенцтва паведамляе са спасылкай на крыніцы аб арышце некалькіх міністраў у Зімбабвэ: міністра ўрада Савіёра Касіківерэ, міністра фінансаў Ігнатыуса Чомбэ і пляменніка Мугабэ Патрыка Жуваё, які займае пасаду міністра дзяржаўнай службы.

Гэтыя міністры - уплывовыя чальцы так званай групы G40. Мяркуецца, што яе чальцы імкнуліся так ці інакш адхіліць ад улады найбольш узроставых палітыкаў Зімбабвэ, якія яшчэ ўдзельнічалі ў барацьбе за незалежнасць краіны. Мяркуецца, што гэта рабілася, каб палегчыць прыход да ўлады жонкі Мугабэ.

Раней вайскоўцы Зімбабвэ абвясцілі аб усталяванні кантролю над дзяржаўнымі тэлеканаламі, аднак адмаўлялі, што спрабуюць зрынуць прэзідэнта. Яны заявілі, што іх мэтай былі «злачынцы, атачэнне Роберта Мугабэ, якія ўчыняюць дзеянні, шкодныя для дзяржавы, прычыняюць сацыяльную і эканамічную шкоду».

Занепакоенасць у сувязі з сітуацыяй у Зімбабвэ выказаў прэзідэнт ПАР Джэйкаб Зума. Ён накіраваў на сустрэчу з Мугабэ і сіламі абароны Зімбабвэ некалькіх міністраў. «Прэзідэнт Зума пагаварыў сёння з прэзідэнтам Робертам Мугабэ, які сказаў, што ён знаходзіцца пад хатнім арыштам, але адчувае сябе добра», - гаворыцца ў паведамленні на сайце прэзідэнта.

Агенцтва Associated Press адзначае, што раніцай у сераду жыхары сталіцы Зімбабвэ Харарэ выявілі, што ўзброеныя вайскоўцы патрулююць вуліцы. Заходнія СМІ таксама паведамлялі, што ў горадзе заўважанае перасоўванне бронетэхнікі. Паведамлялася аб трох выбухах у сталіцы Зімбабвэ.

На мінулым тыдні Мугабэ адправіў у адстаўку віцэ-прэзідэнта Эмерсана Мнангагву, абвінаваціўшы яго ў падрыхтоўцы дзяржаўнага перавароту. Мнангагва карыстаўся падтрымкай войска і разглядаўся як патэнцыйны пераемнік Мугабэ на чале дзяржавы. Пасля гэтага найбольш імавернай пераемнікам Мугабэ ўважалася ягоная жонка.