Віктару Каліне пажыццёва забаранілі выступленні ў Пружанах
19- 15.11.2017, 18:09
- 52,152
У мясцовым Доме Культуры наважылі, што скандальна вядомы шансанье больш ніколі не выступіць на іх сцэне.
Праўда, прычыны не ідэалагічныя, а камерцыйныя. У ДК кажуць, што Віктар Каліна «кінуў» іх, піша nn.by.
«Была справа - Каліна проста не з'явіўся на канцэрт і нікога не папярэдзіў. Нават яго адміністратар не ведаў, што адбываецца! - распавяла Алена Анатольеўна, дырэктарка Дома культуры. - Потым мы ў інтэрнэце чыталі, што ў той жа вечар дзень нараджэння жонкі Каліны адзначалі дзесьці ў Маскве. Можа, там ён і знаходзіўся - ва ўсякім разе, дакладна, што не ў нас».
Дом культуры вярнуў грошы за білеты гледачам і наважыў больш не супрацоўнічаць з артыстам.
«Любы ДК працуе па наступнай сістэме: 80% грошай за квіткі артысту, 20% - застаюцца ва ўстанове. Мы, вядома, вярнулі людзям грошы за квіткі, але яны ўсё роўна вельмі абураліся, - сказала Алена Анатольеўна. - Пазней Каліна звяртаўся да нас, але мы адмовіліся».
Хто канкрэтна сказаў апошняе слова і пажыццёва забараніў спевака - мясцовыя чыноўнікі ці сама яна, - дырэктарка наважыла не агучваць.
Той злашчасны канцэрт павінен быў адбыцца ў 2011 годзе. Мясцовая прэса пісала пра яго: спачатку канцэрт адклалі, потым музыкі ўсё ж прыехалі. Але замест «шансанье» выступаў зусім іншы музыкант. Расчараваныя людзі сыходзілі з залі.
Пазней высветлілася, што замест Пружанаў Каліна выступаў на дне нараджэння ў жонкі расейскага «шансанье» Славы Мядзяніка, у клубе апошняга.
Пасля гэтага за апошнія 7 гадоў Каліна выступаў у Пружанах толькі аднойчы. Сам ён неаднаразова абураўся забаронай, накладзенай на свае выступы, назваўшы гэта «злачынствам, якое варта расследаваць».
Нагадаем, Віктар Каліна пазіцыянуе сябе як шансанье, але творы яго розных і узаемавыключальных жанраў - за песняй пра блатную рамантыку на канцэрце можа быць выканана песня «пра афіцэрскі гонар».
Каліна ўсяляк усхваляе сепаратыстаў Данбаса, сам туды ездзіў і са зброяй у руках, прызнаваўся ва ўчыненні крымінальных злачынстваў.
Неаднаразова публічна нецэнзурна выказваўся ў адрас беларусаў, якія не ўхваляюць яго творчасць.