У Беларусі імпартныя тавары выцясняюць з прылаўкаў мясцовыя

Некаторую прадукцыю беларускай вытворчасці ў гіпермаркетах наогул не знайсці.

У сеткавых крамах Слуцка мясцовыя харчовыя тавары даражэйшыя за расейскія. Разбежка часам складае да 50 капеек за кілаграм. А некаторую слуцкую прадукцыю ў гіпермаркетах наогул не знайсці, напрыклад, слуцкі цукар.

«Кур'ер» разбіраўся, чаму так адбываецца, чым гэта пагражае для вытворцаў і якія захады ў адказ яны прымаюць.

Канкурыраваць па цане мы не можам

Калі раней прадукцыю Слуцкага камбіната хлебапрадуктаў вагонамі вазілі ў Расею, то цяпер не меншымі аб'ёмамі расейскую муку і крупы вязуць беларускаму пакупніку.

«Для таго каб прадукцыя прадпрыемства з'явілася ў сетцы буйной сеткавай крамы, трэба знізіць яе кошт да так званага «прахаднога кошту». І, як правіла, яна аказваецца ніжэй за сабекошт прадукцыі, - распавяла Святлана Максіменя, начальніца аддзела продажаў і маркетынгу Слуцкага камбіната хлебапрадуктаў. - У гандаль пусцілі шмат расейскіх тавараў. Наша прадукцыя пераўзыходзіць імпартную і па якасці, і па дызайну ўпакоўкі. Але канкурыраваць па цане мы не можам. А пакупнікі выбіраюць тавар, што таннейшы».

Са слоў суразмоўніцы, КХП працуе над зніжэннем кошту сваёй прадукцыі, робіць зніжкі і растэрміноўкі ў крамах, хоць гэта не заўсёды выгадна прадпрыемству.

Начальніца аддзела продажаў лічыць, што рэгуляваць сітуацыю ў гандлі трэба на адміністрацыйным узроўні.

Кошт слуцкага цукру на мяжы стратнасці

Восіп Дапіра, старшыня назіральнага савета Слуцкага цукраварафінаднага камбіната, назваў некалькі прычын таннасці расейскага цукру.

Па-першае, цана на газ для беларускіх прадпрыемстваў у чатыры разы вышэйшая, чым для расейскіх. Па-другое, вялікую ролю выконвае цэнаўтварэнне на цукровыя буракі. «У Расеі цана на буракі прывязаная да цаны на цукар. Падае цана на гатовую прадукцыю, адпаведна, зніжаецца нарыхтоўчая цана на буракі. Таму заводы не пакутуюць, калі цукар на рынку таннее. У Беларусі ж закупачную цану на буракі паднялі на 11%, нягледзячы на тое, што рынкавая цана на цукар абрынулася», - патлумачыў Восіп Дапіра.

І трэцяя прычына, праз якой расейскія заводы скідаюць цэны на цукар, - у прадпрыемстваў мала складоў, захоўваць цукар няма дзе. Вытворцы «скідваюць» цукар гандлю, які захоўвае яго ў сябе і не прапускае магчымасці дыктаваць свае цэны на цукар пры яго закупцы.

«Усе гэтыя прычыны прывялі да таго, што расейцы ў стане зніжаць цану, - сказаў суразмоўца. - Цяпер кошт нашага цукру ідзе на мяжы стратнасці. Крамы аддаюць перавагу браць танны імпартны цукар, на яго пачынаюць пераключацца і беларускія прадпрыемствы - кансервавыя і малочныя заводы. Нашымі спажыўцамі застаюцца тыя, каму важна якасць цукру, напрыклад, заводы медпрэпаратаў, пеністых він, Coca-Cola».

Паводле прагнозаў спецыялістаў цукрарафінаднага камбіната, у канцы сезону перапрацоўкі буракоў з'явіцца вялікі пераходны астатак цукру на 1 студзеня - больш за 100 тысяч тон. У камбіната не застаецца іншага выйсця, як назапашваць цукар у чаканні росту коштаў на яго.

«Мы сумесна з іншымі цукровымі камбінатамі краіны спрабуем перад урадам падымаць усе гэтыя пытанні. Іншыя нашы вытворцы цукру знаходзяцца яшчэ ў больш складанай эканамічнай сітуацыі. Нас пакуль трымае на плаву фінансавы запас мінулых гадоў. Але пачынаючы з другога квартала наш прыбытак стаў рэзка падаць. Паказчыкі прыбытку і рэнтабельнасці па гэтым годзе будуць моцна адрознівацца ад леташніх», - упэўнены Восіп Дапіра.

Наш канкурэнт - гэта разведзеная вадой кіслата

Яшчэ адзін вытворца, чыю прадукцыю пацясніла імпартная, - Слуцкі воцатны завод.

Жанна Шчарбіцкі, галоўны тэхнолаг Слуцкага воцатнага завода, патлумачыла: «Усе вытворцы пішуць на этыкетцы, што іх воцат натуральны. Але натуральная прадукцыя не можа быць таннай. Наша прадукцыя з высакаякасных спіртоў, вінаградных вінаматэрыялаў, яблычных зброджанных сокаў. З намі па якасці могуць канкураваць чэшскія і нямецкія вытворцы воцату. А атрымліваецца, што наш канкурэнт - Малдова, дзе наогул няма воцатных заводаў, затое паліцы беларускіх крамаў б'юцца ад таннага малдаўскага воцату».

Tacciana 16:54

У аддзеле збыту Слуцкага воцатнага завода растлумачылі, што танным воцат можа быць, толькі калі гэта воцатная кіслата, разведзеная вадой. Раней у Беларусі дзейнічала забарона на выкарыстанне воцатнай кіслаты. Цяпер яе знялі. І як вынік - канкураваць даводзіцца з няякаснай, але таннай прадукцыяй.

Кошт і якасць - вызначальныя фактары

Віталь Рунцо, намеснік дырэктара па сувязях з грамадскасцю «БелМаркетКомпані», адзначыў, што ўдзельная вага айчынных тавараў у сеткі магазінаў «Белмаркет» сёння складае блізу 76%, у той час як суадносіны беларускіх і імпартных тавараў у гандлі павінна быць 75% і 15% (на патрабаванне Міністэрства антыманапольнага рэгулявання і гандлю).

«Людзі хочуць купляць якасную прадукцыю па больш нізкай цане. Калі мы выбіраем тавар, то глядзім цэны на рынку, праводзім тэндэры сярод вытворцаў Беларусі. Яны прапануюць сваю цану, - распавёў Віталь Рунцо. - Калі сыходзімся па цане, то купляем вялікі аб'ём, каб прадукцыя ішла на ўсю нашу сетку - 73 крамы».