Аляксандр Кабанаў: Дэкрэт №3 яшчэ не выйшаў, але людзі вельмі незадаволеныя

Абноўлены дэкрэт «аб дармаедах» зноў выклікае больш пытанняў, чым адказаў.

«Незадаволенасць у грамадстве не паменшыць і новая рэдакцыя», - перакананы актыўны ўдзельнік маршаў абураных беларусаў Аляксандр Кабанаў. Пра гэта ён распавёў у інтэрв'ю «БелГазеце».

- З лёгкай рукі чыноўнікаў дэкрэт N3 «Аб папярэджанні сацыяльнага ўтрыманства» трансфармаваўся ў дэкрэт «Аб садзейнічанні занятасці». Гэта перамога здаровага сэнсу?

- Улады зразумелі, што нашкодзілі з «дэкрэтам аб дармаедстве», але скасаваць яго не змаглі - для іх гэта як параза. Таму цяпер робяцца спробы змякчыць ранейшы дэкрэт. Але незадаволенасць у грамадстве не паменшыць і новая рэдакцыя дэкрэту, які закране вельмі многіх людзей, безабаронных людзей.

- Назвы розныя, а чым адрозніваецца сутнасць дакумента? Калі раней хацелі ўвесці «падатак на дармаедства», то цяпер плануюць прымусіць «дармаедаў» плаціць па сабекошце за ўсе паслугі, якія аказваюцца дзяржавай. Сутнасць засталася ранейшай - узяць грошы ў часткі грамадзян.

- Я не разумею, як улада будзе рэалізоўваць дэкрэт тэхнічна. Хворы чалавек прыйдзе ў паліклініку - а з яго запатрабуюць энную суму за медыцынскую дапамогу? Чалавек хворы, але ў яго грошай няма - дзяржава адмовіць у медыцынскай дапамозе?

Улады тлумачаць з'яўленне дэкрэта жаданнем легалізаваць ценявыя даходы. Усім, хто сёння атрымлівае заробак у канвертах і не плаціць падаткі, абыякавыя нюансы: яны прыйдуць у паліклініку - і заплацяць па рахунку. Але на самай справе многія людзі проста не могуць працаўладкавацца. Не ўяўляю, як будзе працаваць дэкрэт, ды і чыноўнікі, як мне здаецца, таксама не ўяўляюць. Улады анансавалі, што новы дэкрэт увойдзе ў дзеянне з 1 кастрычніка, але яго няма дагэтуль. Перад чыноўнікамі паставілі задачу, якую яны не змаглі выканаць.

- Якія пласты насельніцтва новы дэкрэт закране больш за ўсё?

- Мне здаецца, у першую чаргу дэкрэт закране сельскіх жыхароў: у вёсцы з працай горш за ўсё. Хтосьці можа сабе дазволіць ездзіць у горад на працу, але шматлікім такое задавальненне проста не па кішэні. Закрываецца шмат прадпрыемстваў. Нядаўна ў нас у Бярозе зачыніліся два прадпрыемствы - не маю ўяўлення, дзе ў нас можна знайсці новую працу.

- Як народ можа ўспрыняць абноўлены дэкрэт?

- Я ўвесь час знаходжуся ў раз'ездах: то ў Пружанах, то ў Івацэвічах, у Бярозе, у вёсках - дэкрэт яшчэ не выйшаў, але людзі вельмі незадаволеныя. Віцэ-прэм'ер Уладзімір Сямашка нядаўна заявіў, што насельніцтва аплачвае толькі 16,8% за ацяпленне, - народ абурыўся. Выхад дэкрэта будзе ўспрыняты людзьмі негатыўна, прычым не толькі той часткай грамадства, якую ён закране непасрэдна. Нават МВФ заявіў: скасуйце дэкрэт цалкам!

- Усе крокі, якія ўлады робяць у сацыяльна-эканамічнай сферы, апрыёры ўспрымаюцца негатыўна?

- Так. Адбываецца рэальнае збядненне насельніцтва, працы няма, заробкі вельмі нізкія, цэны растуць. Адбылося расслаенне грамадства. На самым версе шчасна сябе адчуваюць менавіта чыноўнікі; не бізнэс, не фермеры, не рабочыя. Людзі бачаць, у якіх дамах жывуць чыноўнікі, на якіх аўтамабілях раз'яжджаюць, а ў людзей няма нічога, хоць яны працуюць у поце твару, але не атрымліваюць тых дабротаў, на якія разлічваюць. Незадаволенасць назапашваецца, і яна павінна знайсці нейкі выхад.

- Вас асабіста «дэкрэт аб дармаедамі» не закрануў ніяк?

- Ні мяне, ні маіх сваякоў і блізкіх дэкрэт не закрануў, але закрануў сяброў і знаёмых. Пытанне ў іншым: сёння дэкрэт мяне не закрануў, але закране заўтра. Дэкрэт можа закрануць любога грамадзяніна краіны.

Таму я не магу сказаць: раз не кранула мяне асабіста, значыць, мне абыякава. Тое, што адбываецца ў краіне тычыцца любога грамадзяніна - любы дэкрэт, любы закон можа ўдарыць па кожнаму.