Іранскія спартоўцы прадаюць алімпійскія медалі
- 18.11.2017, 10:37
- 8,322
Спартоўцы хочуць дапамагчы ахвярам землятрусу.
Увечары 12 лістапада на мяжы Ірана з Іракам адбыўся магутны землятрус, у якім больш за 500 чалавек загінулі і блізу 8 000 пацярпелі. Іранскія спартоўцы адрэагавалі на трагедыю і пачалі збор сродкаў, каб дапамагчы людзям, піша «Трибуна».
Алімпійскі чэмпіён у цяжкай атлетыцы Кіянуш Растамі родам з правінцыі Керманшах, якая сур'ёзна пацярпела падчас землятрусу. Ён выставіў на аўкцыён залаты медаль Рыа-2016 і ўсе грошы адправіць ахвярам трагедыі. «Я вяртаю свой алімпійскі медаль майму народу, бо ён належыць людзям», - напісаў Растамі ў Інстаграме.
Акрамя таго, Растамі з іншымі спартоўцамі збірае рэчы для людзей, якія засталіся на вуліцы пры адмоўнай тэмпературы.
Прадаць медаль таксама наважыла Сарэх Джаванмардзі, якая здабыла золата ў стральбе на Паралімпіядзе ў Рыа.
Прыкладу Растамі і Джаванмардзі рушыў услед Масуд Мастафа-Джакар, які ахвяруе сярэбраны медаль Афінаў-2004.
Дапамагчы людзям таксама ўзяўся Алі Даеі, адзін з самых знакамітых футбалістаў у гісторыі Ірана. Ён завёў рахунак у банку, на які папрасіў падпісчыкаў пераводзіць грошы для пацярпелых. «Разам мы можам многае», - сказаў Даеі ў відэазвароце, які за апошнія дні паглядзелі больш за два мільёны разоў.
Землятрус на мяжы Ірана і Ірака - самы магутны сёлета. Штуршкі адчуваліся нават у Ізраілі і ААЭ.