Імперскія штурмавікі брытанскай кароны: прынцы зняліся ў «Зорных войнах»
- 18.11.2017, 20:26
- 10,834
Ніводзін спадчыннік брытанскага пасаду не пацярпеў.
Спадчыннікі брытанскай кароны прынцы Уільям і Гары таемна зняліся ў "Зорных войнах" у ролі імперскіх штурмавікоў для восьмай серыі кінасагі - "Апошнія джэдаі", якая выходзіць на экраны ў снежні, паведамляе bbc.com.
Таямніцу раскрыў ангельскі актор Джон Баега, які іграе ў гэтай і ў папярэдняй серыях Фіна - былога калегу герояў Уільяма і Гары, штурмавіка-дэзерціра, які далучыўся да супраціву.
Унукі брытанскай каралевы Элізабэт II коратка з'явяцца на экранах з галавы да ног убраныя ў белыя даспехі бязлітасных жаўнераў зорнай імперыі. Кампанію ім складзе яшчэ адзін брытанец, актор Том Хардзі - у такім жа строі.
Чуткі аб удзеле прынцаў у "Зорных войнах" з'явіліся ў красавіку мінулага года пасля іх паездкі на студыю Pinewood непадалёк ад Лондана, дзе ў той момант праходзілі здымкі восьмай серыі.
Герцаг Кэмбрыджскі Уільям, другі прэтэндэнт на брытанскі трон, біўся тады з малодшым братам Гары на светлавых мячах, папазаваць у кампаніі кудлатага касмічнага пілота і кантрабандыста Чубакі і пагутарыў з акторамі, уключаючы Баегу.
А цяпер Баега прызнаў, што зняўся ў адной са сцэн фільма з прынцамі, "адзетымі ў строі штурмавікоў", паведаміў сайт Hollywood Reporter.
Таемна адзецца ў беласнежныя даспехі і здымацца ў "Зорных войнах" становіцца традыцыяй сярод брытанскіх знакамітасцяў. У сёмай серыі "Абуджэнне сілы" аднаго са штурмавікоў на службе Яго імператарскай вялікасці сыграў Дэніэл Крэйг.
Актор, вядомы роляй Джэймса Бонда, адмаўляў удзел у здымках, а таямніцу раскрыў толькі пасля выхаду фільма на экраны рэжысёр Джэй Джэй Абрамс.
У гэтым месяцы ўладальніца франшызы Disney абвясціла, што ён жа здымае наступную, дзявятую серыю "Зорных войнаў", а рэжысёру снежаньскай прэм'еры Раяну Джонсану давераць 10-ю ці 11-ю.