У Будславе знайшлі рэдкія рэліквіі, схаваныя ў савецкі час
1- 19.11.2017, 13:27
- 31,185
Пачытаўшы пра рэліквіі у кнізе 18-га стагоддзя, ксёндз пачаў шукаць іх у касцёле.
У касцёле ў Будславе знайшлі рэліквіі святой Кацярыны Александрыйскай. Раней яны знаходзіліся ў бакавым алтары храма. Калі ў мястэчку ўсталявалася савецкая ўлада, рэліквіі схавалі.
Як піша партал Catholic.by, апісанне рэліквіяў было выяўленае ў архіўнай кнізе XVIII стагоддзя, складзенай падчас адной з інвентарызацыяў.
«У Трыдэнцкія часы пры кожным асвячоным алтары знаходзіліся тыя ці іншыя рэліквіі. Звычайна іх ці ўмуроўвалі, ці ставілі на алтар», – апавёў вікарый будслаўскай парафіі ксёндз Міхал Бубен.
Убачыўшы згадку пра рэліквіі ў кнізе, ксёндз пачаў шукаць іх у касцёле.
«У камуністычныя часы рэліквіі схавалі, каб зберагчы іх. Мы знайшлі іх 14 верасня – у дзень Узвышэння Святога Крыжа. Капсула з рэліквіямі святой была загорнутая ў мяшэчак, але знаходзілася ў царкве», – апавёў айцец Міхаіл Бубен.
Рэліквіі святой Кацярыны Александрыйскай – адны з самых рэдкіх у свеце. 25 лістапада адбудзецца ўрачыстае ўнясенне рэліквіяў у Будслаўскі санктуарый.
Адмыслова для гэтага ў Будслаў прыбудзе біскуп Менска-Магілёўскай архідыяцэзіі Юры Касабуцкі. Імша пачнецца а 12-й гадзіне.